一位行年將近80歲嘅紡織界大老闆，不諱言咁話自己由1964年開始買股票，早年更係先買賣美國股票，卻說到今天其實都未賺過錢，縱然佢係出於謙虛，然而計計埋埋真正幫佢賺到錢嘅仍然離不開佢嘅本業。
由於父輩在二戰前已在蘇州辦學，所有對家鄉之捐贈盡在辦學及設立獎學金，透過支持內地教育事業回饋社會，兩代人都係大慈善家，為人非常謙遜低調，為鍛煉頭腦保持清醒，日常出入親力親為自己駕車，在內地工廠用開嘅一輛豐田汽車，行咗16年足足90萬里程，連豐田車廠都話要作樣板，向世人證明旗下汽車有幾耐用，工廠廠房亦歷久常新整整齊齊，反映乜嘢？反映老闆對夥計好，夥計自動自覺幫你愛惜廠房機器。
現代人欠缺尊重熱誠
雖然1948年由上海來港後再到英國留學，卻一直專注於本業紡織實業，成為香港重光後最早站穩陣腳嘅實業家，開咗50幾年嘅成衣廠，不知幫過幾個國際知名服裝品牌代工，好似上世紀80年代嘅香港紅極一時嘅德國男裝品牌，早幾年貪平而離佢而去，走咗去搵廉價大陸廠出西裝，結果累埋個品牌，家佢想返轉頭搵番以前做開嘅廠生產，人家都已經唔要佢。
老人家覺得今時今日，唔止佢、仲有好多行業嘅人都失去對工作本身嘅尊重與熱誠，上級更未有對員工下屬接班人以身作則，行行都出現上樑不正例子。下級對上級欠尊重服從，傳統儒家文化最優良嘅一面就消失淨盡，如本田廠房內每位員工對所負責操作的機械設備都表現高度尊重，每日都抹得乾乾淨淨，就係因為對所負責的機械高度關心，良好企業管理精神包括團隊合作與紀律，企業才得以持續發展，看中國生產嘅產品尤其食品，都唔係從用家健康出發，不難想像也是源於生產商把個人利益放在集體利益之上。
胡孟青
獨立股評人