斥政府留部份頻道備用 不甘掘井益人鄭經翰揚言唔玩雄濤電台

斥政府留部份頻道備用 不甘掘井益人
鄭經翰揚言唔玩雄濤電台

【本報訊】特區政府本年底即將發出首批數碼廣播牌照,其中由名嘴鄭經翰、行政會議成員夏佳理及東亞銀行主席李國寶組成的雄濤廣播被視為「志在必得」;但政府有意將一些頻道「留起」備用,卻令雄濤開台現暗湧。鄭經翰坦言早前已向政府「攤牌」,「一留(頻道)我就唔玩o架喇」,屆時極有可能「壯士斷臂」,轉營網上電台。
記者:許偉賢

除了較早前在數碼港租用一個臨時辦公室外,雄濤廣播近期也在數碼港再租用兩個至少幾千方呎地方,作為日後播音室及市場推廣部。對比同樣有申請數碼廣播牌照的新城電台及鳳凰廣播,雄濤似乎已經整裝待發,欠的只是一個牌照,但作為雄濤牽頭人的鄭經翰日前接受訪問時,卻透露開台與否仍然存在變數。

發射站由雄濤建造

鄭經翰直指政府有意在約近20個數碼頻道中,保留一些頻道不在今次首批牌照申請時分配,「我已經同政府講咗,一留我就唔玩o架喇。」鄭經翰怒氣冲冲指,「冇理由我開咗條水,走去生產收音機、分分鐘送埋收音機畀人;冇理由我搞掂咗喇,數碼廣播成行成市喇,嗰陣商台又話要走入嚟玩,你又畀條頻道佢,咁咪好過癮?」
除了不甘「掘井益人」,鄭經翰也分析政府此舉的利與弊,解釋目前的發射站由雄濤斥資建造;日後成功申請牌照的機構也要向雄濤支付使用費。若政府佔用剩下頻道,「政府都攞錢出嚟嘅話,你都識講:政府攞錢出嚟畀大班做電台呀?我都同政府講咁唔得o架﹗」

雄濤廣播已經於數碼港內另外租用地方,作為正式開台後的廣播室。

批評政府闊佬懶理

鄭經翰強調一旦三間申請公司合共申請的頻道不足20個,雄濤也會「納埋」餘下頻道,「至多做多啲音樂台」,絕不會「生人霸死地」。若政府堅持不讓步,雄濤有可能壯士斷臂,「我真係唔肯再掟錢落去o架,咪轉去做網台囉,又唔使畀牌費,又冇監管;唔該佢(政府)唔好吊起嚟賣,我做冇牌電台佢先大鑊。」雖然政府本年底發牌,但鄭經翰批評政府根本未有在政策上給予支援,例如未有在地鐵及隧道測試接收情況,也未有向入口車商宣傳明年會有數碼廣播,以便有匹配裝置,嘆指「呢啲嘢竟然我哋自己去做。」
鄭經翰又指雄濤由籌備至今足足拖了三年,批評政府「唔鼓勵人做生意」。

「希望喺電台界做一次大改革」

【本報訊】雄濤廣播試播期間已屢創新猷,開設的七條音樂頻道全天候沒有廣告及主持人「干預」,讓聽眾一氣呵成收聽粵曲及菲律賓等冷門歌曲。鄭經翰預告正式開台時更有「秘密武器」,令聽眾耳目一新,暫時能夠透露的只有24小時新聞及主打退休人士的頻道;他最拿手的烽煙節目,自然成為雄濤的主打頻道。

不會偏袒政府

名嘴出身的鄭經翰指現時走在街上,不時被問及何時再開咪,「(因此)雄濤第時最主打嘅台,當然係talkradio啦,我哋搵錢都係靠嗰度;我如果唔做(主持),冇人投資、亦會少咗人買收音機啦。」雖然被指為「煲呔針」,但他強調再開咪時不會對政府偏袒,「如果唔係伸張正義,鬼聽你咩?你只係做支針嘅話,至多咪畀個荷蘭水蓋你,有鬼用?」
除了他這個「台柱」,其他有望成為雄濤主持人者還包括林毓華、梁繼章、蘇絲黃以及一些仍然在廣播機構任職的人,鄭經翰聲言只要雄濤「一吹雞」,以上主持即「埋位」,並強調會在內容節目上有變革,「希望喺電台界做一次大改革」。