星期日係好多人嘅家庭日，獲准提早「出冊」引起外界議論紛紛嘅港大醫學院前院長林兆鑫都唔例外，趁噚日中途宿舍放假，一早離開百勤樓，返去司徒拔道松柏新邨嘅豪宅慰妻，享受familyday。難得67歲的林兆鑫老夫老妻鬼咁恩愛，稱呼老婆做「衰鬼」、「儍豬」，佢仲話好享受搭巴士，唔似得「雞巴男」咁膚淺。
噚日朝早八點半，林兆鑫身穿印花T裇、深色西褲同黑皮鞋，四萬咁嘅口彈吓彈吓行出宿舍，繼續拎住佢個芥辣黃Longchamp袋，喺晴朗一天出發。佢心情靚絕咁同八方講：「今日放假，返屋企呀！」屋企人冇嚟接佢，八方提議載佢一程，佢爽快答應：「咁又唔拘喎！」跟住上咗八方嘅採訪車。
大讚媳婦賢淑孫女可愛
林兆鑫喺車上好健談，講吓老婆，又講吓兩個孫，仲稱呼太座做「衰鬼」、「儍豬」，真係聽到骨都痹。佢話：「衰鬼鍾意整幾味，初初結婚唔識o架，慢慢學囉！家佢煮兩手，一吹雞啲細路就返嚟食飯！」估唔到佢連「吹雞」呢啲俗語都琅琅上口。
佢話，兩個孫女兩歲同4歲，佢喺獄中11個月冇得見孫女面，令佢牽腸掛肚，最近再見，大孫女竟然對佢話：「爺爺，我第二時結婚，你嚟睇我吖！」認真人細鬼大。林兆鑫又大讚媳婦賢淑，放棄個人事業專心湊女；仲話喺監房嗰陣，每個禮拜都收到媳婦寄來嘅家書同孫女相片，令佢感受到家人關懷。
鍾意搭巴士但怕多細菌
林教授家由懲教署嘅中途宿舍，每日去金鐘返工，都要捱巴士再轉港鐵，梗係冇昔日有車接送咁方便啦！不過，佢應該唔會認同近日紅爆網絡嘅「雞巴男」名言「搭巴士真陰功」，因為林兆鑫話：「好enjoy搭巴士，因為可以睇到人生百態。」唯一係貴為名醫嘅佢對細菌零舍敏感，怕巴士多菌，容易染病喎。
對於坐監，佢又自嘲話：「畀咗咁多稅，忽然要我食皇家飯，抵番啲！我睇得好開嘅，呢啲嘢！」講完跟住自己大笑。
八方將佢送到松柏新邨嘅大閘，佢落咗車同保安員招手，就急急腳返屋企享天倫之樂。
mailto:[email protected]