日前睇到「大哨」朗拿度喺哥連泰斯練習賽嘅相，我求大俠真係嚇咗一跳，然後得啖笑。點解？因為大哨肥咗幾個碼，個肚仲大到好似就生得咁。據講，大哨都知道自己肥，同正在養傷嘅巴西中場卡卡喺微博傳情，互相鼓勵話要一齊重返巔峯喎！不過，我求大俠就建議大哨學車仔中場艾辛狂踩單車，操番「弗」身形好過。
大哨知肥望半月fit番
因小腿傷而唞咗3個月嘅大哨，早前終於復操，而效力哥連泰斯嘅佢，日前就同預備組進行咗一場練習賽；不過由於大哨身形暴脹，佢喺練習賽中不知走得幾辛苦，上氣唔接下氣！賽後大哨話：「我都知自己肥，亦因為咁而影響咗活動能力，但係我有信心喺15日後可以操番fit。」
佢之後仲喺微博度講：「我知道有好多笑我肥嘅笑話，但唔好質疑我，我一定會又一次衝過難關。」而受膝傷困擾嘅卡卡就回應話：「咁我可唔可以同你攜手重返巔峯呢？」大哨答：「當然可以。」
艾辛迷踩單車變岩士唐
雖然睇到大哨同卡卡兩師兄弟互相勉勵，我求大俠都好感動，不過齋講始終唔係辦法，要身體力行至得；我求大俠就建議大哨，可以向車仔中場艾辛學習。話說艾辛最近迷上踩單車，仲決定連200幾萬港幣嘅林寶堅尼跑車都唔揸，一於踩單車去練習，將單車泊喺車仔隊友嘅名車旁邊，睇到隊友眼都凸埋，仲幫佢起咗個叫「Lance」嘅花名；因為環法單車賽之神岩士唐個名，就係叫LanceArmstrong。
隊友咁叫自己，呢名加納中場不知幾受落，上屆因傷長唞嘅艾辛仲話：「上季季尾我開始迷上單車，覺得踩單車好有趣，踩住佢四圍去欣賞風景，更加係賞心樂事；而且踩單車仲可以幫助我傷癒之後，回復最佳狀態㖭！」