以硬朗見稱的劉慧卿，未必料到會在2010年的夏天，因為支持政改方案而成為「惹火尤物」，在現實以至網絡世界被批鬥。都是形象惹的禍。卿姐說她硬淨之餘，一直支持妥協；可惜這較為溫婉的一面，卻永遠無法表現於人前。如果政治是妥協的藝術，政客就是藝術家了，我們看不透藝術品的含意，可能是因為我們不了解藝術家的心思。
政改發展峯迴路轉，民主黨忽然獲得中聯辦高調接見，成為特區通過政改方案的關鍵因素，不少民主黨死硬fans一時間接受不了白鴿的妥協，捱轟捱得最厲害的，莫過於副主席劉慧卿。「我知道係有啲市民會唔開心，或者會話我，但我都係會以平常心去面對。」向來討厭人家說粗口的卿姐，一如所料補充一句，講粗口以及狠毒的批評除外。
可是這副「平常心」，看在支持者眼中，卻變得不平常。政改方案辯論首天，卿姐走向支持政改「起錨」的左派團體揮手示好，多年支持者看得儍了眼。卿姐憶述，當日聽到在場請願左派團體叫喊她的名字，「順理成章」主動趨前揮手，她強調這不是第一次，「平時每個禮拜三，邊個嚟揮手我都照揮啦，當時冇乜人影相、又冇乜人緊張」。
政治小動作「從來冇諗過」
事後有人向她說，應該先看看集會者是那門那派才揮手，卿姐卻懶得計算這些政治小動作，「我從來冇諗過，要問過佢哋係乜嘢人先好揮手喎。唔通佢哋係親民建聯、親共產黨就唔可以揮？親民主黨先可以揮？今日如果行出去，有批親共嘅人同我揮手咁點呀，我埋去藐吓佢就走呀？我做唔出喎，任何人我都會揮o架啦！我個人完全係咁，好多人都話劉慧卿最冇機心」。
以前在《城市論壇》，卿姐是維園阿伯的頭號批判目標，現在，還多了一些維園阿哥，腹背受敵，7.1遊行時更被全程狙擊，卿姐說來淡淡然，「都冇緊要啦」。她從容地說：「好似嗰時俾人話我鼓吹台獨，有人嚟我辦事處掟屎，又寄疑似炭疽粉末畀我，傳媒都鬧得好犀利，就連梁振英都話要挑戰我，差唔多有成兩年係不斷被人攻擊。老實講，對比起以前，今次真係驚都未驚過啦。」
戴耳塞遊行「為保護聽覺」
但有一點，卿姐說必須澄清，就是戴着耳塞去遊行的事，她強調只為保護聽覺而非抗拒反對聲音。「其實平時嘈啲我都會戴，幾次遊行都有戴o架，有時開會或者喺議會都會戴㖭；連保護自己都好似有罪咁，真係好奇怪。」
入中聯辦談政改，有人說卿姐自毀「硬淨」金漆招牌，她不以為然，「其實我有一面係非常願意妥協，但係嗰一面，一直都出唔到嚟」。她隨即舉例，多年前立法會各黨共識解決空氣污染問題，就是由她主動提出。「呢一面都係我，表示我係明白到要喺政治上做到嘢，就要妥協、要合作，但係大家就只係睇到你成日要反對反對嗰一面；我去妥協時，都冇人報道㖭。」
市民難接受「普遍是支持」
卿姐直認大家都沒料到中央今次「有得傾」，故此當民主黨決定在中央讓步下支持改良政改方案時，令部份市民難以接受。「泛民過往有條政改方程式：叫價最高、投票否決、最後收工。永遠都係呢三部曲。大家好少去開會傾吓，如果人哋還價，我哋要點回應。」
結果中央今次殺泛民主派一個措手不及，卿姐坦言，不少黨友覺得中央不讓步就最好，「泛民一齊否決，鬧就一齊鬧」。最終要承受被指轉軚壓力而支持政改方案，卿姐至今認為判斷沒錯，她說市民普遍是支持，亦有利推進真普選，「如果得我哋七百幾個民主黨人覺得值得要，但七百幾萬市民唔想要，咁我哋個腦就要攞去換啦」。
若時光倒流「再嚟都會要」
若然時光可以倒流，卿姐仍會選擇支持改良方案。「今日再嚟過，我都會要。呢10席家有好多人討論，搞活番個市，令更多市民有興趣參與。我哋就係想令成個政策有更多市民被捲入去嘛。」
雖然自覺判斷正確，但卿姐也明白，既然政綱上寫明爭取2012雙普選，有需要向選民交代清楚，因此在政改發言期間坦承爭取民主的方式「變了」，並為民主黨放棄爭取2012年雙普選及接受未有終極普選保證的政改方案向市民道歉。
「有啲人同我講，話大家都知道你哋爭取唔到啦，咪下一次去爭取囉。好多政綱寫嘅嘢都爭取唔到呀，你估淨係呢樣？係咪全部都要道歉？但我覺得，既然寫到咁實（2012雙普選），係有需要同市民解釋嘅。」她多次重申，市民若有不滿，可以用選票踢走他們，但她對自己信心十足：「我為香港做過啲乜嘢，係擺晒喺度，以往啲嘢洗唔甩，係鐵一般事實。」
記者 許偉賢
