放假有咩好得過揸住愛驅四圍影相！今次借來掃把佬LegacyGT做長測，遠赴城門水塘做龍友，一覽無遺的靚景的確大把，不過烈日當空光差極大，影出來不是Over就是Under。今日醒你幾招，讓你即變「高呢」龍友！
記者：徐影龍
攝影：林栢鈞
Model：Sansu@PureModels
Legacy爽爆上山
咪以為孭住全身長短火、追住o靚模高低喪炒嗰啲先叫龍友，其實正確名稱係「沙龍發燒友」，專影Moody靚相，即係周潤發、任達華嗰隻呢，幾型呀！久仰城門水塘有大量靚景，但老實講，天時暑熱要我行上山，相信未到馬騮陀地，我早已暈低！好彩有架SubaruLegacyGT做腳車，285匹Turbo引擎爆上山，四驅咬地又好彎，揸嗰個已經夠爽，打開天窗嘆埋急凍冷氣，未到水塘先享受Cool之旅。
落隧道前靠左駛
要入城門水塘，最近位置由荃灣港鐵站下面的西樓角路向東面出發，左轉上蕙荃路及石圍角路，跟路牌直駛至和宜合交匯處，於「梨木樹」出口駛離迴旋處，記住落隧道前靠左駛，再沿途直駛約2分鐘就到。
第一景
碧海藍天夾時辰
驅車約4分鐘後，首個無敵靚景映入眼簾。水塘靚景一覽無遺，水面泛着陽光，鏡頭夠Wide已足夠盡收靚景。
正光位喺晏晝，好彩有大量樹蔭位，怕曬可以匿埋唞唞。
Tony教路：要拍攝藍天白雲嘅主壩景，最佳時間係1pm至3pm，呢段時間屬正光時辰，天空會格外蔚藍，海面亦特別靚。
要小心周圍劃晒黃格，千祈唔好亂泊車。
第二景
借近景增層次感
向前直駛多2分鐘，到達銀禧水壩，不過落咗閘，揸車入唔到去，須徒步走入。
Tony教路：石紋能帶出有力質感，故意將石壩拉近鏡頭，再影遠方玩透視，整體將有更深空間層次感。
附近無正式收費錶位，都係嗰句，唔好違例泊車，大可叫司機朋友喺車度等。
第三景
故意背光玩剪影
沿水壩直行見到鐵橋及塔仔，屬「打龍」勝地，龍友們花最多心思，可惜鐵橋已關，不過外圍影一樣有Feel。
Tony教路：不妨大膽啲用個天嚟測光，浮雲伴住太陽清晰可辨，下方鐵橋同塔仔變剪影，成張相會好Mood好有Feel。
平玩推背快感
Subaru全新第五代Legacy推出後，只匆匆一嚐，今番向代理借來長測，可盡情慢慢玩。2.5L水平四Turbo引擎，馬力成285匹，全車坐滿人再加大堆攝影器材，跑大斜路稍踏油門，靚女Model已興奮叫出：「嘩，推背呀！」四驅亦是Legacy標誌之物，行山路最能發揮，好多連續S急彎都好咬地，唔會踩過對面線咁失禮。而且外形大革新，Subaru玩斯文型Sporty，過往街飛「掃把佬」形象已經不合時宜，好似我呢類七十後，都唔怕畀人話「老飛」。最重要係車價勁吸引，三十零萬買性能同操控已值回票價，加埋全車高級Design同豪華設備，我就覺得好抵玩。
規格
引擎：2,457cc水平四+Turbo
馬力：285ps/6,000rpm
扭力：35.7kg-m/2,000-5,600rpm
傳動：5速自動波四驅
售價：$348,000
查詢：25112727（Subaru灣仔陳列室）
