名與利，真命天子，輝煌事業，這些每個女人都夢想追求的，楊千嬅現在都唾手擁有。新生活，新工作，剛剛與丁子高結婚一周年的她，刻下最渴望是替丁家添個新成員，現在她已積極調理身體準備造人大計。工作上，她剛剛與舊老闆黎明分道揚鑣，轉投林建岳另一間公司華星，面對新環境，千嬅當然磨拳擦掌，尤其開心是得償所願推出國語碟，向大中華進發。家庭與事業，千嬅都邁向新階段，且靜待她的喜訊傳來。 撰文：陳月媚
對楊千嬅來說，結婚生子是她人生最大事業，去年與丁子高結婚，榮升丁太後，現在每日過着幸福美滿的生活，由夜貓變成作息正常的良家婦女，已適應了早睡早起的生活模式，她日前接受本報專訪時說：「嫁咗人，好多生活習慣會改埋，唔會學以前三更半夜都唔瞓，冇12點都唔起身，有咗自己家庭，做乜嘢都會諗埋人哋，唔會好似以前咁任性，想點就點啦！」
感謝舊愛
今日的楊千嬅名利雙收，又擁有一個幸福美滿新家庭，她竟然首先要感謝以前曾經與她談過戀愛的男生：「以前經歷每一段感情都係失敗告終，喺每一段感情結束，我都好似個怨婦咁，哭哭鬧鬧，又會借酒澆愁，將責任全怪責喺男方身上，永遠只睇到對方種種問題。」
直至千嬅遇到膽子比她大，年紀比她小的丁子高才把她人生經脈打通了，千嬅解釋說：「以前總唔會諗吓自己錯喺邊，成日鑽牛角尖，直到遇到我老公，佢係一個好直嘅人，佢夠膽將我所有問題不留情面數晒出嚟，當頭棒喝，忽然之間令我開晒竅，亦因為以前嘅拍拖經歷，畀我有機會認清過去嘅自己，所以我要多謝以前同我拍過拖嘅人，請原諒我昔日嘅任性。」
現年36歲的千嬅認為人生過了30歲，有很多事情已經不夠時間去做，所以一定要懂得珍惜眼前所擁有的一切，而且要多選擇做一些令自己開心的事情，她說：「我家最想做嘅事係生小朋友，希望明年可以造人成功，不過近年身子差咗，生小朋友，我都要先調理好身體先得。不過有咗仔女之後，我冇打算要退出娛樂圈，只不過工作量會減少啲，其實我對事業仲有好多理想，好似我想拍到更多喜歡嘅電影，可以成功打入內地市場。」
演戲開竅
拍完彭浩翔的《志明與春嬌》，千嬅對演戲也開竅了：「唔知係咪因為結咗婚，個人開心咗，好多嘢可以放得開，連愛情觀都改變埋，我演呢部戲時，喺彭浩翔嘅指導下，我開始摸到一啲演戲竅門，開始發現原來我以前真係唔識點去做戲，如果家再畀一啲比較有深層次角色我去演，相信我會掌握得更好。」
別黎明 各走各路
楊千嬅與黎明的Amusic唱片公司合作三年，是非不斷，一直傳兩人不和，今年千嬅約滿轉投林建岳旗下另一間唱片公司華星，但恩怨情仇似乎還未了結，本月初她為10月的演唱會在金鐘香格里拉酒店舉行記者會，同日黎明為新寵JW在附近一間酒店搞EP記者會，似是追着千嬅來打。
難分誰對誰錯
千嬅簽約黎明Amusic這三年，唱片事業發展可說是沒有進展，據說兩人在音樂路向有很大分歧，所以千嬅約滿離開可以說是無可避免的事實。問到千嬅怕不怕被舊老闆黎明追着來打？日前她接受專訪時說：「點解你哋要咁樣去睇件事呢！佢做乜鬼要追住我嚟打，我哋又冇嘢。同日開個記者會，你哋可以有咁多想像。首先我唔認為黎生會咁做，佢係一個紳士，我唔認為佢會想做呢啲事，其實我喺華星或Amusic都係同一個老闆林生（林建岳），兩間公司都係一家人，我真係唔想考究呢啲沒完沒了嘅是非，10月嘅個唱我仲準備請佢嚟做嘉賓。」
雖然千嬅多番強調與黎明並無不咬弦，還說在Amusic唱片三年是有得着，又讚他對音樂很有熱誠。如此為黎明貼金，真的要問她若Amusic有這麼好，為何約滿要離開？千嬅解釋說：「我相信黎生係有花心思去幫我搞唱片，自己都曾經盡量去配合，但音樂係好主觀嘅，當彼此對音樂取向走唔同嘅路，問題就會出嚟，其實冇話誰對誰錯，我要離開純粹因為想再同Evelyn合作，Evelyn好有音樂才華，我同陳奕迅啱啱出道時係華星嘅年代，所唱嘅歌，大部份係佢搵畀我哋唱，佢完全知道我想要乜，大家合作好默契。」
出國語碟圓夢
轉投新唱片公司華星後，千嬅最開心是終於可以達成出國語碟的心願，三年前她離開金牌唱片其中一個原因就是公司一直未能兌現出國語碟的承諾，後來轉投東亞娛樂，又等了三年，直至今年才順利錄好國語碟，可以在年底推出。
千嬅開心說：「遲啲都好過冇得出，我終於等到啦！其實我喺以前無綫擁有華星嘅年代都出過國語碟，但後來轉咗唱片公司，又因為種種原因，先至會相隔咗七、八年後先有機會再出國語碟，雖然家已經錯過咗唱片業最好景時期，但音樂總會有生存空間，不過點都好，我總算了咗個心願，好滿足啦！」
