民主黨10月8日舉行創黨16周年酒會及晚宴，份屬反對派嘅民主黨，黨慶活動向來冇乜達官貴人捧場，去年得行會召集人梁振英賞面出席，已經十分罕見。今年唔同往日，家陣民主黨同北京有偈傾，與中聯辦有交情，因此今年黨慶，盛會一場，令人期待。
其實民主黨年年都有發出請帖畀中聯辦、解放軍駐港部隊等中方機構，不過年年冇回音，據知黨內初步決定，今年請帖名單照舊，至於賓客會否出現，唔係民主黨能夠控制嘅事。黨內人士又話，除咗中方要員，該黨亦有廣邀各國駐港領事，其中美國領事館幾乎年年有派代表。今年黨慶晚宴席設尖沙嘴TheOne煌府，鑽石席2萬元一圍，黃金席1.2萬元一圍，唔知梁振英今年買幾多圍坐幾耐先走呢？