民建聯花錢搵商台塗脂抹粉嘅節目《十八仝人愛落區》，喺廣管局判罰商台之後爛尾收場。民建聯使咗幾十萬元，想話將黨內新星捧上位，點知適得其反，節目未出街已經備受批評，就算出到街，效果相信都唔理想，事關不斷有人追擊民建聯同節目主持，有網民做足功課，發現已出街15晚節目，半數喺節目期間被追擊，十分狼狽。
由於唔想再被人追住嚟鬧，號稱要去勻全港18區嘅安排，好多時變成錄音唔係直播，由落區到室外變成匿埋喺室內，有幾次民建聯嘅客席主持人，更加要半途走人，剩低商台DJ獨撐大局，十八仝人愛落區，似乎名不副實。今個月24號係林彬死忌，廣管局噚日宣佈裁決，相信好多商台長期聽眾可以順番條氣。