電腦節又鬧雙胞，咪益咗我哋囉，好似第二年參加灣仔電腦通訊節嘅本地影音品牌VDiGi為咗搶客，到時會一口氣首賣全新型號嘅藍光播放機Mini12、雙Tuner高清錄影機VDi-S、倍線全高清DVDDV-663之餘，仲以震撼價發售佢哋首部全高清LEDiDTVE100系列電視機。
圖像介面操作易
VDiGi巿場經理張穎恒（Ray）話，新推數碼電視系列分22吋、24吋同42吋。家巿面嘅42吋全高清LEDTV大約萬三、萬四蚊。VDiGi嘅42吋新機定價賣$12,499，比巿面同尺寸產品平一成，但為咗打響招牌，決定大劈價，以四折成本價$4,999喺會場發售，數量限售50部，「家42吋LCD電視機平嘅都要賣五千幾蚊，呢部LED唔使五千蚊，真係史上最平」。
阿Ray仲話，新機除咗夠平，另一賣點係有錄影功能，加埋圖像化介面設計，操作最容易，師奶都識玩，「家啲大牌子電視機，普遍冇錄影功能；E100只要加個外置硬碟，一按即錄」。
阿Ray笑笑口話，新機劈價賣，舊款陳列機蝕本價清貨，包括雙Tuner高清錄影機VD-i現價$1,480，蝕本價$999；藍光播放機Mini6現價$1,290，蝕本價$888，「每款各約140部，話就話係陳列機，但係有一半係包裝盒都未拆嘅新機，我哋先賣新機，再賣陳列機。價錢一樣，先到先得」。
電郵：mailto:[email protected]