骨灰龕供不應求，香港人死無葬身，甚至葬灰之地，唔只自己人關注，特首煲呔鬧人唔好各家自掃門前雪，連國際權威時評雜誌《經濟學人》（TheEconomist）都留意到香港人閉翳身後事問題，最新一期嘅雜誌有篇文章講述香港骨灰龕位不足嘅文章，港人白事頓成國際新聞。
社會矛盾造就商機
《經人》文章題為Overmydeadbody，副題係Forgetburial--acrowdedcitynolongerhasroomevenforashes，佔成半版篇幅，頗為顯著。文章提到沙田碩門邨居民，早前遊行抗議政府建議喺區內興建骨灰龕，相信碩門邨街坊點都估唔到嗰次示威會一鳴《經人》。
煲呔鬧人各家自掃門前雪，《經人》指雖然特首開聲，不過居民照樣反對，而呢種社會矛盾，卻造就商機，致私營骨灰龕位有價有市，一個港幣20萬元嘅骨灰龕位都十分搶手。《經人》又指出，由於港府會立法規管私營骨灰龕位，預計龕位價錢有升無跌，事關立法後非法經營者要離場，合法龕位就更加渴市。
面對呢嚿肥豬肉，《經人》指出連上市公司都垂涎，賭王嘅信德集團就計劃大發死人財，喺澳門興建大型骨灰龕場，閒閒哋都有5萬個位，香港唔敢開嘅賭場，唔願興建嘅骨灰龕位，澳門都百無禁忌為香港人提供生前死後服務，真係難得。
兩個月兩度論港事
八方記得《經人》近期都有評論香港社會狀況，上個月中有一篇三個全版嘅文章，係關於香港最低工資立法，指此法一立，已故經濟學大師佛利民形容香港係自由經濟實驗場嘅實驗告終，兩個月兩次評論港事，都算罕見。
話說回來，香港人土葬無望，火葬又無龕位放置骨灰，《經人》提議大家採用經濟實惠嘅海葬，政府每星期一次安排親友出海撒骨灰，讓骨灰隨風四散，落在大海，畀先人遠離怨聲四起嘅居民，讓先人耳根清靜，豈不更好！
mailto:[email protected]