詹瑞文前晚喺演藝學院再度開騷大演棟篤笑《笑帝》，當晚黃秋生都有到場支持，詹瑞文以多個不同造型出場大講笑話，又同佢徒弟泰臣以雙星報喜look唱雙簧狂寸圈中人，連秋生都唔放過，話秋生個樣十足黑社會嘅人，兩師徒又出盡力狂踩近日歌影視皆忙嘅林峯，詹瑞文話：「近日有個風好勁，就係林峯，不過好快過。我好鍾意林峯，對佢改觀咗。」泰臣問點解，詹瑞文搞笑話：「因為佢改咗五官，同以前唔同咗。」
跟住詹瑞文問泰臣古天樂定吳彥祖靚仔啲？泰臣話古仔皮膚黑啲，吳彥祖就較白，詹瑞文即搵位寸林峯話：「混埋一齊咪變林峯囉，妖，唔睇喇。」
玩埋包致金姪女
另外詹瑞文同泰臣及蝦頭，再以皇帝同妃子及臣子嘅造型出現，今次則以包致金姪女為目標，蝦頭笑話自己係「包紙巾」姪女，詹瑞文聽見即叫泰臣拉蝦頭出去斬，蝦頭即時打泰臣一巴，仲話：「Idon'tcare，Iwanttoleave。」跟住泰臣同蝦頭又扮方力申同鄧麗欣（Stephy），演出《十分愛》嘅情節，但就狂踩Stephy戲屎。
至於喺香港俾詹瑞文狂窒嘅林峯，日前同黃宗澤一齊返上海宣傳新劇《摘星之旅》，難得去到上海，佢哋抽時間去參觀世博，唔使排隊就可以入展館參觀，十足貴賓一樣。