除了超人識變身，傢俬都可以拉長㩒扁！實惠家居登陸MegaBox開出2萬餘呎的超級旗艦店，變身巨無霸家品主題樂園，更豪氣十足，一埋牙就大贈送，新歡舊愛索價狂減。不過最激還是那掀起「空間爭奪戰」的傢俬尺寸修改服務……
記者：馮敏兒
攝影：陳陶鈞
Model：Isis@Puremodels
出位狂減明搶分店生意
MegaBox實惠旗艦店於今日正式登場，裏面除了過萬件傢俬、家品、電器，還有多個示範家居單位，更首次出現廚房產品即場示範，煮出一店令人垂涎的飄香。為造勢，旗艦店即日推出引死街坊的$1超級優惠，由今天起至9月3日，連續3星期，每日推出一款精美貨品，天天不同，包括價值$349的四層塑膠櫃、$288.8的雙人全棉印花床品套裝（床笠+枕袋+被袋），還有護目燈、茶具全套、平底易潔鍋、靚靚厚墊三摺椅、除塵掃、單人冷氣被、抽氣扇等等。條件只是在店內買家品買滿$100，不過講明換完即止，爭奪戰在所難免！
旗艦店更出現明搶分店生意的神奇現象，連自己人都無面畀，推出「獨家」低至四折優惠，16吋負離子遙控驅蚊座地扇，半價$269.5，一桌兩椅餐枱$249，木架布衣櫃$149，還有大量八八折、六八折再折的傢俬優惠……都係時候為自己頭家，改頭換面了！
不滿現實掀空間爭奪戰
全新推出的「尺寸修改服務」，與訂做傢俬不同，如你發現了「一見鍾情」的設計，又是列明可供修改尺寸的傢俬，就算大小與屋企唔夾，都不用放棄，因為標準顏色和尺寸都可以按需要而改，睡床、床褥、地櫃、組合櫃、衣櫃、鞋櫃或梳化，均可拉長縮短、增高改矮，只要符合限制，就能善用家中每寸空間。服務附加收費由$200至$1,700之間，亦受個別條件限制，例如梳化一般最多只可加長12吋，深度也不能改，衣櫃更要考慮結構安全。彈鉸梳化最多增長3吋，現每消費滿$5,000，即送$1,000以下的修改服務費，由即日至26日，書房系列的尺寸修改服務更有八折優惠。
實惠家居旗艦店
地址：九龍灣宏照道38號MegaBox企業廣場L5-08
查詢：26295300