【本報訊】政府再出招打壓樓市，一手及二手樓市同受影響，二手市場除即時有炒家劈價沽貨外，準買家亦臨時縮沙，押後入市。業界估計，短期內樓價或借勢向下。
第一城單位劈價沽
利嘉閣地產聯席董事馮樹勳表示，政府連環出招即嚇窒買家，有業主更因一時心雄，結果「搞到客都冇埋」。事緣大角嘴維港灣8座一個609方呎單位，在政府出招前夕，有買家出價460萬元，業主卻心雄不賣。豈料翌日政府公佈打擊炒樓措施，業主即知驚願賣樓，但輪到買家縮沙，交易告吹。
近期炒到癲的沙田第一城更有炒家劈價出貨。世紀21奇豐分行經理吳元利表示，一名炒家被政府出手嚇窒，昨急劈價近半成，以176.8萬元沽出屋苑51座低層410方呎單位。另一手持屋苑多個單位的炒家，其中1伙昨亦即減價5.7%至198萬元放售，但乏人問津。
另外，大角嘴兩個高價樓花盤開始有二手放盤減價求售。市場人士表示，帝峯．皇殿3座低層C室，1,005方呎，昨減價40萬元至1,060萬元放售。另形品．星寓低層L室，叫價亦由365萬元降至355萬元，減幅2.7%。
中原財務董事總經理梁理中料短期內樓價跌5%。星展唯高達研究部主管張一鳴認為，新政策令一手樓花不可以炒賣，「即等於股票停牌，有得賺都冇得買賣」；禁止炒一手樓，勢必令二手成交大受影響，「起碼靜幾個月」。