新任私隱專員嘅蔣任宏做郵政署長時，署內發生多宗侵犯私隱事件，最廣為人知嘅首推針孔攝錄機偷拍員工，由於個底花咗，新專員未返工已經被外界猛烈批評，工會、人權組織都指蔣根本唔適合做私隱專員。
指員工欠護私隱意識
蔣任宏噚日同傳媒茶敍時強調絕對唔認同有關批評，佢話當時身為署長，對偷拍事件係責無旁貸，「但在個人層面嚟講，我必須指出咁唔等同我漠視個人資料嘅保護……有關個案只係反映我喺郵政署長期間，個別同事當時對保護個人資料私隱嘅意識唔夠高」。
蔣專員仲話，唔想因為個人歷史問題而影響公署運作，所以決定同傳媒交代清楚，噚日準備咗兩張寫滿事件始末嘅「貓紙」解釋，千言萬語都係嗰句話，就係「我冇錯」。但踢爆蔣任宏在任期間侵犯私隱嘅香港郵政局員工會就唔認同呢位前上司嘅自白，該會副主席林寶鎮坦言感到失望，「到家佢自己都唔肯認錯，佢從來冇就事件向員工道歉，佢咁講只係卸責」。