無綫女藝員李綺雯（o靚妹）和南華球員陳肇麒（陳七）的戀情去年11月曝光即玩完，男友重投圈外女友Natalie懷抱。近日傳出陳七狠撇Natalie，除了嫌女友黐身外，導火線是女友偷看他的私隱。o靚妹拒評這些行為是否缺德，但她卻表示情侶間要互相信任和尊重。
香港足球先生陳肇麒去年底被揭與李綺雯暗交半年，但期間仍與舊愛Natalie未斬纜，一腳踏兩船，經Natalie力挽下，成功踢走情敵o靚妹，Natalie與陳七復合後，不時以勝利者姿態高調與陳七拍拖出巡晒恩愛，可是Natalie太黐身，近日被爆陳七上月底出發到南韓集訓前，索性狠撇Natalie。
7月重遇傳翻撻
據知陳七向Natalie主動提分手，除不滿女友太癡纏外，令他最難忍是Natalie過於大女人，管束男友甚嚴，擔心男友背着她媾女，有指她不時偷看陳七手機短訊和facebook，令男友全無私隱可言，辣㷫陳七，忍無可忍下決心叮走女友，這是二人分手的導火線。
近日又有消息指陳七上月參加友人生日派對，席間碰到o靚妹，過氣情侶相遇，陳七發現自己對o靚妹一直未忘情，有意翻啅女方，他並背着Natalie與o靚妹以短訊聯絡。曾受陳七傷害的o靚妹暫未敢再闖情關，寧可專心投入工作，據悉她對陳七的翻撻行動有所保留。
對於陳七被Natalie偷看私隱，o靚妹前晚在電話回應時小心翼翼：「我唔知佢哋啲嘢，最好問番佢哋好啲。」問o靚妹對女友偷看男友私隱的看法，o靚妹說：「點都好，兩個人相處要互相尊重同信任。」o靚妹可曾偷看過以前男友的手機短訊、電郵或facebook？她自嘲：「我呢方面好渣，我覺得同嗰個人一齊就要信人。」
陳七微博報近況
可覺偷看別人私隱的人行為缺德？o靚妹說：「呢個問題好敏感，我就會尊重大家私隱。」她表示自己事無不可對人言，不怕將來男友偷看私隱，她抵死地說：「我又冇唔見得光嘅嘢，如果將來男友想知，我咪主動畀佢睇囉。」到底o靚妹可會考慮與陳七復合？她立即語塞：「吓！我可唔可以唔答。」o靚妹隨即以開工為理由掛線。至於陳七則仍在南韓集訓，他大前日在微博留言指當地正狂風大雨。
採訪：林妃
