"荷蘭新鮮人海鷗變白鴿"
英超未開，「現在」台狂播二線波搶客，上個周末下午睇完日聯，晚飯之後睇英冠同荷甲，深夜仲播埋法甲同晨早開波嘅美職聯，將goaltv嘅節目搬晒去6字頭嘅台。其實對我哋呢類忠於足球仲係過去一直訂開無記收費台嘅球迷，影響不大；不過粵語評述嘅大哥可能初試啼聲，乜都覺得好新奇，連荷甲直播見到踢緊波，草地成群雀仔都好興奮，不斷大叫好多白鴿周圍飛。大佬呀，荷蘭近海，嗰啲係海鷗，睇個嘴同身形都分到啦，唔係啩？
"想睇英超真大「鑊」"
趁幾天假期，專登去旺角同易拉架位「畸寶」sale搭訕，話有意思同你公司再續前緣，我冇好似盧覓雪喺世盃副刊時，話喺街俾個女sale「小姐當太太」嘅遭遇，今次嗰位後生仔好殷勤好有耐性，講解畀我聽佢哋個新計劃600蚊睇5個月係乜東東㖭；但搞咗一輪正當我想扑槌之際，問真啲，原來家我住緊嗰度，要裝隻鑊先睇到，唉，要畀多成千銀，即刻走頭。做任何事都應該係停一停，諗一諗，尤其係消費。唔通好似晚晚睇緊嗰個廣告節目，叫人唔怕不斷消費，借財仔還信用卡條數慳息咁啜核咩。
"奧尼爾劈炮啟示"
估唔到奧尼爾教維拉教到未開波先劈炮，都咪話唔巴閉。其實佢老哥教波幾保守，唔係好合家時勢，維拉班波唔係咁draw到客，近幾季試衝高位都去唔到；打份工，無突破，再不求進步，再無爭勝嘅動力，離開尋新出路絕非壞事；不過維拉或再賣走兩件，今季估計係見頂回落格，想再入前6，唔易咯。
"賭友噩夢將過？"
打從一個月前世盃決賽至愛嘅荷蘭加時輸畀狂牛，但開到讓球下盤幫到擁躉後；大家有冇印象，足智彩開盤球賽爆冷之多，同家酷熱天氣成強烈反比。單係上個禮拜英冠4場直播全開下盤，澳職７場全下盤，荷蘭波強隊亦得燕豪芬幫到上盤客，法甲馬賽里昂一出，熱W齊倒灶；賭波唔睇求賭，長買下盤真係幾時都贏到開巷，尤其係季初，強隊多數得5、6成功力，粉絲都係咪咁熱情好咯。
"周末最有信心愛華頓"
話咁快英超又開鑼，屋企未裝畸寶，但近排天天要返工，全無影響；季初策略要保守啲，今明捧4隊作客：曼城、愛華頓、史篤城同周日阿仙奴。最有信心係愛華頓，唔係只盲目長買下盤，呢隊波今季人腳變動甚少，加咗個射球機器碧福特，活力更足，暫時係小弟英超重點球隊推介；就算今次要作客少讓亦要捧，有平手買更安心；另外三個下盤都頗穩，進取，可博曼城同阿仙奴冷W。
語錄：點解冇咗王牌節目英超睇，「現在」台唔主動減月費，不過作為消費者，我建議大家主動打電話去據理力爭，否則，買啲8號仔股票幫補吓囉！