人紅是非多，潮爆宇宙話題被拿來戲謔亦屬意料中事。乘着近年荷李活再掀吸血鬼熱潮，擺明惡搞片《搞乜鬼吸啜大製作》（VampiresSuck）下周亦告港美同步推出，從角色造型到笑爆嘴嘅各場口嚟睇，幕後誓要出盡法寶嚟向《吸血新世紀》（Twilight）系列「致敬」，酷愛呢類玩嘢片嘅觀眾可有福了。撰文：戶川淳
除咗港產笑片有時會用中西名片橋段來搞爛gag外，荷李活也有整套戲都喺度瘋狂惡搞嘅「不惜一切博君一笑」作品，最新一齣就係擺明車馬狂玩《吸血新世紀》嘅《搞乜鬼吸啜大製作》。
稱得上叫《搞乜鬼》，原來呢齣戲又係呢個系列兩大幕後黑手積遜費特堡（JasonFriedberg）和艾朗西沙（AaronSletzer）攜手煉成，就算劇情言之無物都要喺個半鐘入面製造大量無厘頭笑料。
男女主角似層層
既然係玩謝《吸血》系列，片中三位主角固然係飾演「白面cool友」、「露體狂花o靚」和「發姣學生妹」，話說有三分似正版貝娜嘅Becca（珍寶絲姬JennProske飾）正值青春期，於女人湯丸Edward（麥連達MattLanter飾）同周身毛嘅Jacob（基斯力治ChrisRiggi飾）之間左右逢源，兼且得到「愛麗B」同「LadyBraBra」等好友搖旗吶喊，理應開心到飛起，但佢個惡死老竇同乸型細佬阻頭阻勢，搞到Becca煩到七彩。
正因所有橋段都咁無厘頭，所以吸血男成日要上妝補粉、狼人驚變芝娃娃、幾位比堅尼辣妹紅噹噹跳熱舞同激似美國人氣真人騷《JerseyShore》咁成村大隻佬扭籮晒肌肉等場面便接踵出現，更唔少得拉埋其他人氣大片像《愛麗絲夢遊仙境》（AliceinWonderland）落水，crossover得嚟唔算太突兀。
當然本片亦有唔少仿效頭兩集《吸血》名場面嘅情節，如Becca拜訪Edward家不慎割損手指，要吸血男大力推開受血腥引誘嘅胞弟而撞到鋼琴散晒等，但表現效果誇張癲喪，令人笑到卡卡聲。
話你知：搞乜鬼方程式
雖然無厘頭喪笑西片年年都有，但認真搞到系列化就屈指可數，而近十年喺荷李活就出現咗《搞乜鬼》黃金孖寶積遜費特堡和艾朗西沙。佢哋早於2000年同另外四人炮製了大玩《奪命狂呼》（Scream）嘅《搞乜鬼奪命雜作》（ScaryMovie），一舉成名後繼續埋首搞創作，直至06年和07年推出狂玩多套收得愛情喜劇與矚目大片嘅《搞乜鬼愛情爛片王》（DateMovie）同《搞乜鬼大製作》（EpicMovie），沿用一貫笑彈連爆方程式，風評不俗。
不過前年呢個組合嘅《賤郎300》（MeettheSpartans）與《搞乜鬼咁多災難片》（DisasterMovie）則眼高手低，被選為當年最垃圾作品之一，幸今次《吸啜》外界反應尚算幾好，有望幫孖寶重振聲威。