無綫電視雖有CCTVB嘅「雅號」，但裏面好多記者心中仲有團火。國際電視藝術與科學學會日前公佈今屆國際艾美獎入圍名單，呢個頒獎禮專為表揚美國以外優質電視節目而設，無綫舊年12月出街嘅《星期二檔案》，憑專題報道《拐童》獲提名，競逐時事組大獎，對手有嚟自英國、加拿大同阿根廷嘅節目。頒獎禮定於9月27號喺紐約舉行。
《拐童》講述內地小朋友被拐之後，父母點樣四處尋親。呢輯嘅記者兼編輯王玉娟同八方講，近年內地傳媒冷處理拐童新聞，父母有寃無路訴，「冇咗小朋友已經好慘，連佢哋嘅聲音都被打壓」。佢兩年前亦有報道入圍，但空手而回，今次佢都係抱平常心，「有提名已好開心」。