【本報訊】因參加「釋前就業計劃」而獲准提前出獄的香港大學醫學院前院長林兆鑫，昨日為免工作地點曝光，花了整個上午擺脫記者追訪，沒有上班也沒有即時返回中途宿舍，涉嫌違反有關計劃規定。他晚上返抵宿舍時首度透露，正在慈善基金擔任顧問工作。記者：簡明恩、黃偉駿、謝明明
現年67歲的林兆鑫，昨晨7時26分提着一個紙袋離開入住的大窩坪中途宿舍百勤樓。身穿白色恤衫及黑色西褲的他，看到門外守候的記者時說了句「小心路滑」，便步行至龍翔道巴士站候車。
他登上一輛42C線巴士後，只乘搭一個站便下車，待同車記者也下車後，突然轉身返回巴士上，車門隨即關上，記者改以採訪車尾隨。林隨後再下車轉乘38線巴士到龍翔中心，當發現記者仍在跟隨，即走進龍翔中心假裝看水牌，又問記者：「飲唔飲茶，我請！」後改往黃大仙站乘搭港鐵，其間多次轉車「遊花園」。
林在8時許抵達中環後，前往歷山大廈Starbucks咖啡店，買咖啡坐下享用，更主動邀請記者同坐，但表明：「如果錄音我就唔講嘢。」隨即發表連番「偉論」，由批評本港醫療體制，到贊成本港發展為醫療港，甚至大談麥當勞的成功之道原來是靠地產。他又大談Starbucks的成功是因為「全世界都有聚腳點」；牛奶公司「唔係賣牛奶賺錢，係佢哋嘅農場最賺錢」。談到未來路向，他坦言未必可以再做醫生，「你哋都知啦……我比較鍾意做research，關於病毒細胞嘅研究分析」。當記者問他為何不用上班，他稱已向「僱主」解釋：「我話要同啲記者周旋，所以返唔到嚟住。」
遊花園半日撇甩記者
林在Starbucks跟記者天南地北「閒談」四小時，其間用手機打了數次電話。到中午約12時半，他「借尿遁」，如廁後從後門離開，步行到畢打街登上的士，在轉燈時成功擺脫記者。
傍晚7時許林兆鑫返抵中途宿舍，已換上簇新的恤衫及淺色西褲，主動向記者揮手，稱下午有去上班，又說現時在一個慈善基金擔任工作，「好低調，我係做醫療同埋教育嘅顧問，大家理念好相似，都係為中國人，希望中國人有良好教育、醫療，幫到窮人脫貧」，然後返回宿舍。
懲教署不評論個別個案。根據《囚犯〈監管下釋放〉條例》，參與釋前就業計劃的囚犯需受監管令約束，若無合理權限或合理辯解而違反監管令條件，最高判罰5,000元及監禁一年，更可能被撤銷監管令，再度返回監獄服刑。參與計劃的囚犯若工作有臨時變動，例如無法如期上班或臨時放假，須通知負責監管的懲教人員，並立刻返回中途宿舍。負責監管的懲教人員平均每兩星期突擊囚犯工作地點，有需要會增加突擊監察次數。
林兆鑫昨日行程
7:26am
離開中途宿舍，步行到龍翔道巴士站候車上班
7:35am
登上42C巴士，但只坐了一個站便下車，圖擺脫記者
7:50am
擺脫不了記者，在黃大仙站改乘港鐵往中環
8:15am-12:40pm
在中環歷山大廈Starbucks買咖啡，跟記者同枱聊天，其間打了幾次電話
12:45pm
從後門離開，到畢打街乘搭的士，成功擺脫記者
7:35pm
換上了另一套恤衫及西褲返抵中途宿舍
林兆鑫吹水摘錄
‧你哋信唔信耶穌，知唔知耶穌喺邊度？（記者：你係基督徒，有冇感到內疚慚愧？）呢個問題我要6個月後至答你。
‧（記者：你今次提早出獄，知唔知係邊個講出嚟o架？）我咁多仇家，唔知邊個講。
‧以前我唔食晏，只係食早餐同晚餐，早餐食個橙同熟番茄，唔錯o架。（問記者）下晝想食乜嘢，我請！
‧（記者：獄中飲食得唔得呀？）你問錯問題，因為冇得揀，不過我都食夠啦，唔會再食。
‧你哋知唔知Starbucks嘅賣點喺邊度？因為佢喺全世界都有聚腳點。你哋又知唔知麥當勞嘅成功唔係賣漢堡包，佢哋嘅CEO話係地產呀。牛奶公司唔係賣牛奶賺錢，係佢哋嘅農場最賺錢。
‧2000年最重要嘅發明係乜嘢？係DNA解構圖完全發展，可以將現有生物學同物理學完全結合，義肢同身體嘅結合就係生物同物理嘅結合。
‧你哋跟住我，我今日唔返工啦。我老人家可能耐性好過你哋，你哋後生血氣方剛，可能耐性冇咁好，睇吓邊個等得耐啲！
‧我未必可以做番醫生，你哋都知啦。我比較鍾意做research，關於病毒細胞嘅研究分析。香港醫療喺低稅制下有好多問題，新加坡嘅醫療比較好，政府同市民喺醫療開支上共同分擔，有完善計劃同分配。
‧原來我瘦咗咁多，裏面（獄中）冇鏡，睇番報紙先知原來我咁瘦。
‧以前醫學院我有副對聯，走咗之後唔知會唔會俾人拆咗呢？
資料來源：林兆鑫、本報記者