一向唔係好鍾意睇短線市況點走，財經版記者唔知頭唔知路打嚟問個市聽日點睇後日點睇，擺到明係想你將對方預先準備好嘅心聲同睇法講一次出嚟，然後就將之化為你嘅睇法，前面加埋你嘅大名，就成功交差。不過記者遇着我呢類人應該覺得極無癮，好似噚日咁，我只係答佢「當大部份散戶點睇，個市就可以掉轉嚟睇；當散戶落手落腳唔信邪大舉造淡，佢就會挾上殺一鋪。」聽到對方都有啲莫名其妙無所適從。
睇好睇淡一樣黑
明眼人都見，呢排港股成交縮難搵食，否則唔會咁多「賓架」行家匿晒入私竇玩德州撲克，扮晒撲克王。總之一句講晒，班大帝都喺睇住啲倉位睇殺嘅。本周一指數臨收市前一分鐘死都要挾爆21800，就係要幫熊仁仔收屍；當坊間終於多咗人信個市唔肯跌，尤其是當藍燈籠被擦鞋仔話唔再係藍燈籠嘅時候，個市又放心向下炒，噚日死都要穿21000支持殺晒啲牛仔才再收番21100之上，唔夠一個禮拜、更加未等到今日黑色星期五，睇好睇淡都一樣咁黑仔。
當你已經唔再日日對住班客真金白銀咁落盤，或者以期指散家倉位係好係淡嚟測大市會向哪一個相反方向進發，既然睇短期走勢唔係自己強項，無謂自暴其短，今年我每次見到沈大師，反而會問番佢點睇個市，睇短期走勢唔係自己強項，算入到賭場你都會跟贏到開巷嗰個落注啦。舊年大大聲話睇淡唔做淡，畀啲市場打手話自己睇錯唔認錯，我唔會介懷，總之你理得我點睇，明知當多人信你睇嗰邊就死跟，咁就不如一係唔表態一係就玩模稜兩可可也，費事又被大戶利用祭旗。
睇短期走勢唔喺自己強項，挾硬俾方向隨時會俾個市玩番轉頭，舊年識得聽而又聽得明後面叫你唔好做淡嗰半句嘅話，就知道應該點樣趨吉避凶。
胡孟青
獨立股評人