機戰迷又要瘋狂喇！事關下星期PS3有隻《AnotherCentury'sEpisode：R》，當中包含12款機戰系列機種，款式之多，近期少見，最新公佈加入嘅《機戰OA》更有多款新機登場，機戰迷必煲！
記者：許福合
12款機戰動畫參上
《ACE》系列一向以集合機戰動畫機械人，與異世界敵人對戰為主題；新一集仍承繼這傳統，暫時公佈12款戰機動畫中，有一半以上都係初次登場，連《機戰OA》亦有多款機種使用，淨係選機體就已經令人好滿足！今次遊戲發生在艾利亞星球，玩家除要擊倒異世界敵人，還要一邊探索當中隱藏的秘密。遊戲上得PS3，畫面水準當然高，高解像3D畫面已非常正，間中加插CG動畫，靚似睇OVA。
空中追擊戰
機戰遊戲操作，一直沿用機背、第三人視點，《ACE：R》亦唔例外；主要玩法亦係要選擇合適機體完成Mission，不過遇有特別Mission，畫面會轉換成追擊戰模式，這時操作會大幅簡化，甚至連武器都會轉為半自動，但要注意四周狀況，隨時作出閃避，玩法就同打飛機遊戲相似；由於機體種類多，所以實際操作就因應所使用機體改變，例如大部份機體都會配備多種武器，使用L1掣就可以隨意切換。彈藥方面，除常規裝備，今次加入Tension系統，畫面上會有個張力計，特殊攻擊同機體必殺技就靠晒佢喇！不過當然係要計氣、就住用啦！
三段儲力
另一招好常用嘅儲力攻擊，當出招前按住攻擊掣，就能夠儲力，並分為三段式，若能成功儲滿，無論係攻擊力定係彈數都會增加，不過三段儲力有啲難度，好容易被打斷，二段就較易使出。
眾多機體中，高達系列都應該叫玩慣，所以不妨轉吓新口味，首推超時空世紀ORGUSS，跟番原作有變形系統，人形、半人、戰機同戰車，武器亦有好多種類，好值得試。從官網透露，首批遊戲會附有Code，可以立即用到Z高達3號機，唔使慢慢打先用得到。
Profile
AnotherCentury'sEpisode：R
主機：PS3
類型：動作
廠商：NAMCOBANDAIGames
發售日期：8月19日
人數：1人
官網： http://www.ace-game.jp/