哇噻，親愛的陸離終於復出了！早前替鄧小宇的羅宋餐增頭盤，又為凱旋歸來的《歲月神偷》當現場目擊證人，雖然確實執起支筆寫字，可都給人友情客串的感覺，多少有點睡眼惺忪；但這次在《蘋果》修理梁文道，卻完全龍精虎猛，狀態回勇到未做石琪老婆嗰陣。梁粉稍安勿躁，我們這些望到頸長的讀者眉飛色舞，並非與道長有仇，而是因為旱得太久，只要天肯落雨，哪一片低窪地淪為重災區都不介意。甚至不怕你罵我身痕，有那樣的良師肯紆尊降貴鞭撻，我一定送上門攤大手板，望她的藤條高高舉起低低放下，一方面虛心汲取教益，一方面暗暗得戚：揀都揀我嚟懊惱噃，你地恨都恨唔到！
「中國學生」四次返老還童變成「中學生」，究竟是手民之誤還是貴人善忘，相信當事人很快會作出交代，屋頂上的小狗鐵棒磨成針，《戰爭與和平》是一日一字讀出來的還是打出來的，再秘密大概機制也包不住。連老朋友陳輝揚是否凡心未盡（色心又起？），涼血的我都不那麼緊張，反而對tosornottos的迷思感到莫大興趣。實不相瞞，早在闖進法語領域之前，我的論盡已經激得死替莎士比亞維護純正的義勇軍，不但犯了好s唔s的毛病，而且慣性係又s唔係又s。當年在三藩市窮途末路，曾經博懵賣英文維生，同居男友打字機慘遭霸佔之餘，還被逼成為冇酬勞的私人校對。紅筆改得手軟，他不禁發脾氣：「點解你乜都寫成複數？」我理直氣壯笑嘻嘻答：「你唔知中文冇s嘅咩？成世未食過朱古力，一旦入到朱古力廠，睇你忍唔忍得住口吖嗱？」