溫碧霞與金融才俊夫婿何祖光結婚10年來，她因忙於事業及享受二人世界，將生兒育女之事一拖再拖，結果霎眼已屆44歲之齡仍無所出。個半月前溫碧霞決定到江蘇領養一名被遺棄於火車站的男嬰，為他治好皮膚病及咳嗽，又替他申請成為美國公民，扭轉了孩子命運。面對着精靈可愛的1歲養子，溫碧霞不禁母性大發，揚言會待他如親生仔，萬般疼錫。
溫碧霞和丈夫何祖光於2000年在布吉島結婚，今年10月1日國慶日正是兩人結婚10周年紀念。不過礙於過去10年她未能放低演藝事業，又樂於享受二人世界，一直未有實踐造人大計，但隨着年歲漸長，近月夫婦經過商議後，決定領養一名內地兒童，組織一家三口展開新生活。
「睇相已經好鍾意」
溫碧霞在個半月前親往江蘇帶着養子來港，為他取名何國倫，英文名Xaver源自阿拉伯文，寓意聰明。前日她抱着下月滿1歲養子到中環買學行車，首次曝光的小Xaver體重達20磅，肥嘟嘟、笑容多又活躍。現場見溫碧霞很錫BB，全程都跟他玩，引他注意，令BB笑不停，她見狀也笑不攏嘴，母子情滿瀉。
談到收養經過，溫碧霞前日接受本報記者專訪時揚言是緣份使然，她說：「兩年前我老公嘅一位朋友用美國公民嘅身份收養小朋友，我見佢哋好開心就諗住申請，因為我老公又係美國公民，於是就辦手續。今年5月我收到有關嘅資料同相，我睇相見到呢個BB已經好鍾意，覺得同佢好有緣，而且我老公又鍾意小朋友，我哋揀咗之後，7月1號就去內地接佢，再帶BB同埋老公去夏威夷攞美國passport。」
「BB初時成身紅疹」
小Xaver其實是個孤兒，溫碧霞說：「BB喺江蘇俾人遺棄喺火車站，俾人執咗之後送去孤兒院，嗰時佢體弱又病；我接BB時佢成身出紅疹，咳得好犀利，我送佢去深圳睇私家醫生，家好番晒啦，短短1個月重咗幾磅，仲有個肚腩仔。」
榮升母親後的溫碧霞近日更刨書惡補育兒經，她笑說：「初時BB成日咳，我見佢唔舒服我個心都好唔舒服、好痛。我當正佢係親生一樣，會好錫佢，我會帶畀佢幸福，佢亦帶畀我同老公無限喜悅。個個都讚佢好乖，唔會成日扭計，好易湊。我最近買咗好多書，學點樣照顧小朋友，自己都學到好多，餵奶、換尿片都冇問題，連佢第時上乜嘢學校都plan好，我希望佢喺香港讀書，12、13歲時會送佢去美國。我唔使第日佢有乜嘢成就，健康成長就夠，不過之前冇人教BB，佢講嘢發音唔係太識，學習慢啲。」
「我會時刻陪住佢」
溫碧霞又直認因年紀大才放棄生育：「我以往有懷孕恐懼症，見到好多朋友結婚同生仔之後離婚，好可悲，以前我又想過二人世界，加上一路又做嘢，遲遲唔生，到想生時自己嘅年紀同身體已經控制唔到。」她又說：「我老公嘅兩個妹都係生女，屋企冇男丁，所以我先揀男仔，呢個係上天安排，以後我會無時無刻陪住佢，希望由接BB開始到佢嘅成長階段，都一路陪住佢。」
採訪：魯萍 攝影：陳慧安
場地提供：荷花集團
人物誌：火辣海潮成跌膊Icon
現年44歲的溫碧霞入行至今28年，經典作包括處女作《靚妹仔》、與劉德華合演的《停不了的愛》，以及於無綫劇集《火玫瑰》中飾演「跌膊海潮」，被封性感icon的她在96年和台灣國民黨將軍何應欽之孫、現職瑞士私人銀行寶盛香港區董事兼亞洲產品部香港區主管何祖光相戀，並於2000年10月1日國慶日在泰國布吉島結婚。
婚後溫碧霞漸漸淡出娛樂圈，過着闊太生活，出入高級場所外，偶爾也接拍自己喜歡的廣告和電影來調劑生活，她還不時到內到作慈善探訪，生活充實。
