葉童自從入行以來星途順暢，憑型格演繹兩度獲封香港金像影后，不過事業順遂並未能令她開懷，葉童坦言曾因太執着而不開心，故她演繹《摘星之旅》中幸福貴婦鄭明珠，因知道丈夫劉松仁的秘密而慘成怨婦時，也同情明珠太執着。
在無綫劇集《摘星之旅》中，飾演富商海亮（劉松仁）太太鄭明珠的葉童，本來有一個幸福的家庭，丈夫劉松仁對她呵護備至，囡囡梁靖琪與她關係甚佳，但因為知道丈夫一個天大的秘密後，隨即變成一個充滿仇恨的女人。
自恃精明增誤會
早前在尖沙嘴接受訪問的葉童堅持不透露劇情，她說：「今次拍得開心，呢個劇可以發揮我嘅所長，所以我都好期望o架。喺部劇入面我以為自己好精明，但原來處理感情問題一啲都唔精明，加上又聽埋身邊啲小人去講是講非，更加加深咗啲誤會。」
假如現實生活遇到同類的問題會怎解決？葉童笑說：「嗰種俾人出賣嘅感覺，真係令人做好多愚蠢嘅事，我覺得應該畀個機會佢解釋。」她更有感而發地說：「做人點解會咁唔開心？其實係因為人太執着，成日要以自己行先，要以自己為主。做人係好大嘅學問，如果可以唔咁執着，期望要求越少，做人都會開心啲。」
生活簡單最開心
這是否葉童的生活格言？她笑說：「以前我成日覺得點解呢個角色唔係我做？點解又冇嗰啲明星咁好際遇？跟住我又會諗我都有呢個本事，如果由我做會更加紅。嗰陣我唔覺得自己開心，但係家經歷多咗，會覺得點解要成日同人哋比較？每個人都有自己際遇，開心同唔開心都好簡單，只係視乎你自己點去選擇。」
撰文：何慧斯 攝影：仇志德
場地提供：GatewayHotel