煲呔話香港人好奇怪，樓價越貴越買，因此樓價飆升，都無礙市民置業，最近連民主黨都想入市。該黨現時於太子嘅黨總部，由一班創黨黨員組成嘅公司持有，物業最近供滿，家陣個市咁旺，民主黨心思思細屋搬大屋。
初步估價，家總部出售大約可套現600萬元至700萬元，佢哋心目中希望可換面積大一倍、約4,000呎嘅單位，以目前市況估計，大約拎多500萬元至600萬元出嚟就可以再「上車」。副主席單仲偕透露已有初步選址，係九龍西港鐵站附近工廈，如果新界有筍盤都可以研究吓，但一定唔揀港島區，事關港島樓價佢哋負擔唔起。民主黨中委會今晚開會討論，係咪要為買新總部設立專項籌款。