雖然世界盃曲終人散，帶動嘅3D熱潮方興未艾，好似最積極推3D電視機嘅Samsung，噚日首賣全新旗艦機3DLEDTVC9000，55吋咁巨型嘅畫面，鈦金屬外殼嘅機身厚度只係7.98毫米，即係1cm都唔夠。Samsung消費電子業務總監鍾孝揚Alex話，新機賣點之一就係全球最薄嘅電視機，比iPhone仲要薄。
小妹即時吓部掛牆新機，機身薄到好似冇厚度，畫面貼住牆咁，小妹戴住副立體眼鏡睇，影像破框而出玲瓏浮凸，搞到啲低胸裝女模狂擺pose，狂谷事業線同電視鬥3D。
輕觸式遙控器有3吋芒
Alex笑笑口話，消費者嘅要求越嚟越高，電視機外形設計要薄要靚襯得到屋企，功能又要多，「新機薄得嚟全功能，可以2D畫面變3D，又可以上網睇YouTube，甚至交友網站」。
Alex強調，另一賣點係配備3吋芒輕觸式遙控器，可以即時同步睇電視。以品味型男自居嘅藝人陳豪都有嚟試機，佢同小妹講最buy呢個「分唇」，「睇睇吓波急起上嚟拎埋遙控入廁所睇，有埋Wi-Fi連接，隔住牆轉台都得」。
講明係旗艦級，價錢一啲都唔平，賣價$69980，另送價值$1680嘅3D體驗套裝，包括兩副3D眼鏡同3D藍光碟。
Alex話，Samsung今年4月開始售賣3D電視機，定價都幾進取，而且反應都幾好，家3D電視機嘅銷售量比例，佔公司整體電視銷量嘅一成。
電郵：mailto:[email protected]