「階下囚」國美（493）大股東黃光裕（圖），同國美現任主席陳曉正式開火單嘢，除咗街外人會話好睇，華華101%相信，國美小股東一定會話無眼睇！好似美資基金富達（Fidelity）咁，喺呢單嘢（黃生喺獄中話要炒陳曉魷魚）爆咗出嚟之後第二日，即喺8月6號，已經喺場內以每股平均0.312美元（約2.434港元），大手沽咗1.792億股，套現差唔多4.36億元，持股量由5.57%降至4.37%，低過5%，即喺以後減持都唔使再披露……識得用寬頻速度沽貨，呢隻基金，應該喺做到嘢之流！點解咁講？家陣大股東擺明玩嘢，就算呢鑊基金股東肯出嚟投票撐國美董事會，過到呢關，點知黃生又有咩新招o架，換馬玩過第二隻股好過。
李華華