半途出家嘅副局長表現有目共睹，運輸及房屋局副局長邱誠武不時被議員批評，最近更成為政黨杯葛對象。話說李永達喺上月中安排菜園村村民到立法會同邱誠武會面，點知身在立法會大樓內嘅邱誠武死都唔肯見村民，激到高達紮紮跳，佢向主席何俊仁投訴邱誠武待慢民主黨。
何俊仁落封殺令
由於邱誠武往績不良，仁哥最終落封殺令，要求黨員咪騷邱誠武，黃成智首當其衝，據聞佢原本約咗邱誠武飯局，但黨主席有令，惟有請邱誠武食檸檬。副局闖禍，局長鄭汝樺就做中間人，擺和頭酒要求民主黨中人放邱誠武一馬，不過民主黨唔買賬。
除咗民主黨，八方聽聞其他黨派對邱誠武評價都麻麻，邀請佢落區開居民會都耍手擰頭，十分錫身。商務及經濟發展局副局長蘇錦樑都被指唔識撈，上任兩年幾都未同過民主黨對口議員，即係主責公平競爭法兼經濟事務委員會主席李華明會面甚至傾電話，反而民建聯一call就到，擺明親疏有別。