九人女子組合Cookies當年出道成為一時佳話，不過自從佢哋拆夥後，已經好少機會見九個女仔重聚嘅場面，噚晚其中四位餅碎區文詩（Angela）、何綺玲（Elaine）、陳素瑩（Gloria）同馬思恆（Helena）喺九龍灣舉行「曲奇Happy2gether音樂會」，其他餅碎只得吳雨霏（Kary）、楊愛瑾（Miki）同蒲茜兒（Serena）喺台下捧場，昔日好姊妹鄧麗欣（Stephy）、傅穎（Theresa）就冇現身支持。
Theresa同Miki分別送上花籃為好姊妹打氣，反而之前盛傳拉攏餅碎杯葛Theresa嘅Stephy就人同禮都唔到，似乎唔多畀面。
賀Serena新婚
至於已退出幕前嘅Serena噚晚拖埋老公到場，佢好開心咁話同老公之前已經註咗冊，成班好姊妹都好戥佢開心，所以喺表演中途，四餅仲捉咗佢哋上台恭喜呢對新人，成班人喺台上玩即影即有，希望佢哋兩公婆留住美好一刻。
Stephy同Theresa都曾被批評唱歌走音，估唔到Angela佢哋四個都除唔掉走音之名，噚晚佢哋以一首《紅組加油》打響頭陣，點知走音之餘，亦唔夠氣，Helena仲被發現咪嘴演出！
