越來越發覺香港啲小朋友青少年好有繪畫天份，14歲香港少女田智婷透過畫作《層層疊》，比喻大自然各種生物互相緊扣嘅關係，提醒大家要拯救呢個病入膏肓嘅地球，每個人都要出一分力。呢幅畫仲啱啱喺聯合國第19屆國際兒童環境繪畫比賽奪得總冠軍，成為新一屆「少年畫壇奧斯卡」得主。
擊敗300萬份作品
田智婷同八方講，《層層疊》嘅意念係來自大自然食物鏈嘅關係，就好似層層疊呢個遊戲咁，若果不斷抽走木條，最終成個結構都會冧落嚟，正如大自然嘅食物鏈都係環環相扣，若果環境受到污染破壞，生物面臨絕種威脅，最終喺層層疊上面嘅地球就會倒下破碎。
田智婷今次攞獎唔容易，因為比賽分兩輪評審，要喺全球合共300多萬份參賽作品中，脫穎而出，成為全球大獎得主。聯合國環境規劃署10月將舉行全球最大型嘅青少年環境會議，屆時田智婷將應邀出席，仲會擔任開幕嘉賓兼領獎。佢嘅得獎作品又會全球巡迴展覽，仲會印成為宣傳刊物、海報同明信片等，宣揚環保訊息。