青藏鐵路通車之後，西藏變咗旅遊熱點，公民黨議員湯家驊趁暑假同太太入藏度假，點知前日一抵埗就出事，出現高山反應，要入西藏自治區人民醫院留醫，遊西藏第一個景點唔係參觀布達拉宮，而係入醫院，湯家驊慨嘆認真掃興。
落機即現高山反應
湯家驊上月中同太太去咗以色列旅行，返港後一星期，原定本周一到成都，再轉火車入藏，卻因事忙而押後至星期二出發，改搭飛機直達拉薩。湯家驊話可能本身有少少感冒，因此落機冇耐就覺得唔舒服有高山反應，為安全計，湯太決定送老公入醫院。
年屆60歲嘅湯家驊平日有做運動，今次入藏變入院，佢話十分掃興，醫生指佢血液含氧量低，所以要佢吸氧氣同打點滴，幾時出院視乎醫生意見，至於出院後繼續行程，抑或提早返港，佢話稍後先決定。如果按原定行程，會玩到下星期二或三返香港。
湯家驊留院期間仲可以上facebook交代病情，顯示情況差極有限，其實出現高山反應可大可小，輕微者會頭痛、冇胃口、嘔吐、疲倦、頭暈同失眠，嚴重嘅高山症患者，會有腦水腫或肺水腫，家庭醫生鄭志文同八方講，如果冇適當治療，患上高山症分分鐘冇命。
入住全國百佳醫院
好多年前許冠傑去尼泊爾拍戲時患上高山症，雖然平安返港，但好多人覺得佢有後遺症，湯家驊喺西藏出院後，會唔會都有後遺症，影響公職呢？鄭醫生話如果只係有高山反應，病人適應當地環境，或者返回低地後就會冇事，若然係嚴重高山症，出現腦水腫令腦部缺氧令腦細胞死亡，咁就十分手尾長啦。
呢次湯家驊入住嘅西藏自治區人民醫院，位於布達拉宮東側，被評為三級甲等醫院、全國百佳醫院同「群眾滿意單位」，有500張床位，千幾個醫護工作人員，湯家驊大可放心休養。人望高處，從政嘅人都想上位，但上到去頂唔順，始終要退下來，呢幾日，湯家驊應該體會甚深。
mailto:[email protected]