在新片《龍鳳店》飾演巴辣李鳳姐的徐熙媛（大S），在戲中以藤條怒打微服出巡下江南的皇帝任賢齊，惡毒無理。儘管大S在戲中百般折磨小齊，但二人合作過後，小齊指現實中的大S細心體貼，極力硬銷她，並希望自嘲為宅女的大S可以早日覓得好歸宿。
由徐熙媛及任賢齊主演的笑片《龍鳳店》，早前完成拍攝，下周四（19日）在港上映，劇情講述飾演皇帝的小齊微服出巡下江南，與巴辣惡死的李鳳姐大S結緣，發展一段愛情故事。
雞蛋掟頭腫晒
小齊在《龍》片中拍攝有甜有辣，他笑指今次拍攝與大S有少許親熱場面，小齊說：「拍愛情幸福場面，當然有少少福利，可以拖吓手。」但戲中出名狠辣的李鳳姐以藤條教訓小齊，小齊表示，幸好大S體貼，事前先試打自己試力，又問小齊能否接受力度，小齊說：「好在大S為人體貼，否則冬天用藤條打落嚟，真係特別痛。」小齊透露還有一場難捱場口，戲中交代他被拘捕捉上囚車遊街被人掟雞蛋，他說：「啲雞蛋又臭又硬，好難頂好痛，掟到個頭爆開腫晒。」
小齊表示，首次與大S合作拍攝喜劇，小齊心目中的大S是一名有性格的靚女，小齊說：「佢風格好特別，佢演火辣嘅李鳳姐好適合，同佢好強嘅性格好相似，原來大S好識照顧人同關心人，有機會我會介紹啲男仔畀佢識。」
大S厭惡相睇
在戲中遇上真命天子的大S，在現實生活仍是等待姻緣來臨，自嘲是一名宅女的大S稱，除了工作便困在家中，早前妹妺更為她撥大葵扇，介紹妹夫的朋友給她認識，大S說：「當時整家人，包括媽媽、妹妹，全世界都關注我能否成功，這樣相親的感覺令我很尷尬、很大壓力。」大S很懂照顧人，希望有男仔可以讓她照顧，更直言渴望覓得一個顧家、耐心及健康的結婚對象。
採訪：張俊銘
服裝：Valentino（徐熙媛）Bauhaus（任賢齊）
