貴為「全港至有實力華資大行」、今日開始招股嘅耀才證券（1428），噚日喺金鐘擺下洪門宴，sorry，係筵開9席宴請同業做上市前推介。各路人馬畀足面座無虛席，遲到者惟有坐後排旁聽，耀才可謂夠晒「飛士」！
咁成場都係股壇名嘴，敦沛嘅李偉傑、滙業熊麗萍、金利豐黃德几、大福郭家耀、東驥嘅龐寶林都喺度，華華梗係問吓呢班高人點睇呢隻新股喇，殊不知幾個名嘴齊聲話唔好講，大家行家唔方便做評論；噚日蒲頭，只係捧吓場兼摸下行家個底，無人敢好似何B師傅大大聲講「耀才證券是你首選」，名嘴封嘴，華華咪惟有O嘴行開囉！
李華華