只要有番咁上下波齡嘅香港球迷，冇可能唔識史賓沙。呢個外號「矮腳虎」嘅前麗新射手，踢而優則教，做過幾年侯斯頓戴拿模助教後，來季將會擔任美職聯升班馬波特蘭伐木者嘅教練，滿足佢多年嚟做主教練嘅心願。
呢隻「矮腳虎」喺80年代尾、90年代初活躍於香港球壇，係少數喺港甲打滾後，返歐洲球壇仲可以踢出一片天嘅猛將。佢離開麗新後，投效車路士登上事業高峯，4季為藍戰士攻入43球；到96年更代表蘇格蘭參加歐洲國家盃，當時連我哋港甲都叨光不少o架！可惜佢其後屢受傷患困擾，之後踢過昆士柏流浪、愛華頓同埋馬瑟韋爾都無甚佳作。
球員事業發展停滯不前，反而令佢一早為前途作好打算，喺01年毅然走去美職聯加盟科羅拉多急流，踢到04年掛靴，為教練事業鋪路。本報喺3年前曾派記者同佢做專訪，當時已經係侯斯頓戴拿模助教嘅佢話：「我目標要向其他教練偷師，希望終有一日擔任主教練，然後返老家、英格蘭，甚至去香港教波。」
結果史賓沙做咗侯斯頓戴拿模助教5年，唔單止助球隊贏得美職聯冠軍，08年又親自帶領侯斯頓戴拿模預備組揚威當地預備組聯賽。
猛將僅得鈴木隆行
波特蘭伐木者喺前年獲美職聯賽會允許，由2011年開始由美甲升美職。家陣39歲嘅史賓沙，暫時手上並無猛將，最為港人熟識應該係日本外援鈴木隆行。
點都好，史賓沙能夠圓教練夢，固然係一早為前途籌謀嘅成果，但亦要多得美職聯近年積極擴大規模；家陣得16隊角逐嘅美職聯，來年就增加到18隊，而2012年計劃增加到20隊。
想當年：彼得梁、和哥大讚
曾經同史賓沙共事，前麗新領隊梁守志（Peter）同埋主將李健和，都對史賓沙讚不絕口，據Peter講，當年史賓沙來投麗新嘅借用費為3萬蚊美金（約23萬港紙），當時以一個蘇超（格拉斯哥流浪）預備組球員嚟計，都算係貴價貨。
史賓沙喺89/90年同譚拔士爭聯賽神射手，雖然最終落敗，但仍喺香港足球明星選舉當選最佳11人，當屆入選者除咗譚拔士，仲有巴貝利、山度士同埋任煒雄等，而史賓沙仲當選嗰屆總督盃最佳攻擊球員。據講超晒班嘅史賓沙，當時月薪大概係5、6萬港紙，另有房屋津貼。
「佢做教練好有條件」
「和哥」認為史賓沙教波好自然：「以佢返英國仲可以踢大球會，入埋蘇格蘭國家隊，之後去美國發展，咁嘅閱歷就有條件做教練。」