我求大俠發現，原來曼聯都有個比比，但呢個比比唔同皇家馬德里嘅比比，佢嘅英文串法係Bebe，皇馬嗰個就係Pepe，而且佢係喺孤兒院長大，以及踢過流浪漢世界盃，所以真係夠晒gimmick。最有趣嘅係，比比呢個「英超犀利哥」，仲分分鐘會踢走「英國紳士」奧雲㖭。
踢過流浪漢世盃
曼聯領隊費格遜淨係向o靚仔埋手，繼簽入基斯史摩寧同埋「小豆」查維亞靴南迪斯後，日前喺佢嘅前助手、現任葡萄牙國家隊教練基羅斯推薦之下，引入20歲嘅葡萄牙前鋒比比。查實比比剛剛加盟甘馬雷斯，老費為免夜長夢多，冇同甘馬雷斯傾轉會費，索性出760萬鎊（約9,120萬港元）買斷佢份合約。
比比個樣普通到爆，相信球迷睇過之後都唔慌會記得，但佢嘅背景就令人留下深刻印象，事關佢細細個就流落街頭做街童，之後俾人送咗去孤兒院，長大後仲代表過葡萄牙出戰流浪漢世界盃，所以用「英超犀利哥」嚟形容佢，似乎最適合不過。
前線爆倉奧雲勢危
老費對身高達6呎2吋嘅比比評價甚高，大讚佢多才多藝，除咗可以打前鋒，仲可以踢埋進攻中場，而且隻右腳仲非常厲害。比比嚟咗後，連埋都新加盟嘅「小豆」，加上原有嘅貝碧托夫、朗尼、奧雲同馬捷達，前線真係爆晒棚。原本貝碧托夫最有機會被送走，不過佢喺友賽表現好，又喺社區盾入波，所以應該可以留低。咁樣嚟睇，奧雲被叮走嘅機會最高。冇計啦，佢無復當年勇，而且又成日受傷，但若然真係衰喺個乞兒手上，難免令佢好唔甘心。
話時話，老費喺買比比嘅同時，仲有機會簽得德國天才中場奧斯爾。聽英國傳媒講，老費喺社區盾嘅賽前，特登走去小屋球場睇富咸友賽雲達不來梅。有傳曼聯同不來梅及奧斯爾只係差少少細節未斟掂，情況就如基迪拉早前由史特加過檔皇馬咁。