周秀娜出書，搞到書展人山人海；周秀娜去大學講talk，逼爆演講廳；前幾日，周秀娜帶同師妹們搞寫真之旅，一樣爆團出發，娜姐的萬誘引力真厲害，難怪男團友們影影吓都忍唔住突圍入水！
文：肥腸
攝影：韋迅
鳴謝：康泰旅行社
團友水着爆過七模
今次俾康泰諗到必殺絕招，搵來Chrissie（周秀娜）和六個師妹A.Lin、DaDa、Mia、Suki、Betrys、Jeana，帶領近60位團友（95%都是男團友啦），去到德慶盤龍峽，喺山山水水之下，以相機會o靚模，不得不寫個服字。
今次盤龍峽之旅，主要去生態旅遊區其中三個景點，水車王國、薰衣草王國及森林水世界。只得三個地點？無他，醉翁之意不在「景」，在乎o靚模也，觀光其次，行程主要活動係同攝影有關，可以對住七模對足幾日影影影……龍友們粉絲們夢寐以求啦。
「周秀娜抱抱花田寫真之旅」整個行程的高潮位，在第三日的「碧波蕩漾水世界」攝影環節，一眾o靚模水着上陣，同團友們近距離接觸，近成點？有男團友因為天氣熱心頭hot，影影吓終於忍唔住除剩條三角泳褲跳埋入泳池，身貼身與Mia和Suki合照！團友搏到盡，反觀o靚模們的比堅尼外竟加了件tee，這樣的水着好似保守咗少少囉，有團友就反映有啲失望，好彩最尾都有得同各位模特兒一齊影相。
較密實的A.Lin同Dada於旁邊小泳池拍攝，慘遭餵蚊！
Suki、Betrys同Mia旅程中表現較文靜。但到水着環節，性感演出殺團友們一個措手不及。
六位數字器材出戰
一般到盤龍峽區的旅行團，三日兩夜團費約$1,200，今次「周秀娜抱抱花田寫真之旅」，團費加保險及雜費等，大約$2,600。貴成千幾蚊都咁多人參加，因為計落真係抵，除咗有得旅行，平時book一個模特兒四個鐘都要八百幾蚊，家一共有七模，仲係對住3日2夜喎，都未計現今身價出個show都幾萬元的周秀娜，加千零元，抵晒啦。再者，對龍友來說，可以同志同道合分享拍攝心得，呢個真係無價。粗略估計，團友每人約帶二萬元器材，整個團就有過百萬的攝影器材和電子產品，其中一位身穿「浪子」tee的龍友，更帶同六位數字的器材隨行。離開盤龍峽之時，一班團友依然興高采烈，仲拎出多部iPad逐張跟團友分享相片。
海寶粉絲娜姐上身
今次旅行團，除了有龍友，當中亦不乏o靚模的粉絲，即使自己唔多影相，亦報團參加撐偶像，當中尤以3日2夜都以海寶造型亮相的趙先生最為突出。他說自己是周秀娜粉絲，不過佢亦好欣賞已為人母嘅Mia。趙先生之外，好多團友於攝影活動開始無耐，已經多次突破保安的防線，站在o靚模旁與她們合照。3日2夜之旅，訪問過不少團友，大部份都說抵玩，更有說時間不夠，又想增加簽名環節……
最搏師妹Jeana
周秀娜率領6位師妹出團，娜姐只露纖腰露滑腿，已教團友們失控。而6位師妹中，今次最搏是Jeana，更得到不少團友的讚賞。
TravelMemo
持有效回鄉證或卡均可。中旅社：28533533
「周秀娜抱抱花田寫真之旅」只此一團，不過錯過咗都唔使揼心。因為今次試驗團反應好，康泰及模特兒公司正計劃於11月添食，地點有待公佈。而康泰平時的盤龍峽3天團則由$1,219起。康泰旅行社：21088888
220V，兩扁腳/三扁腳插座
CrazyforChrissie
溫馨提示：可以同偶像去旅行兼影相真高興！不過出發前最好為攝影器材額外購買保險，即使有乜損傷或唔見咗都無咁肉痛。
中國 廣東
下周多雲有雨，26-35℃
