美食節昨天開鑼，$1美食又例牌成為參展商的搶客攻略，好似早年以「$1冰下魚」賣到響朵的北海道海鮮網上專賣店優質堂，今年再度加碼推出$1海鮮，包括北海道特產花咲蟹、三文魚、油甘魚和鮫魚，全部賣大包。雖然抵到爛，但都不可亂咁煮暴殄天物，即請Kei-san教大家煮餐豐富海鮮。
記者：趙珮倩
攝影：伍慶泉
菜譜及示範：優質堂北海道海鮮批發老闆杉內馨
Kei-san
北海道海鮮網上專賣店優質堂老闆杉內馨（Kei-san），原籍北海道，曾到美國留學4年，長駐香港26年，能說流利廣東話。現為TVB收費電視主持《星級廚房》，擅長炮製各式日本海鮮美食。
法式花咲蟹海鮮湯
00hr45min
製作難度：★★★☆☆
份量：4人
花咲蟹不用煮可直接吃，擦完成隻剩番大堆蟹殼唔好嘥，皆因其蟹殼擁有濃厚的蟹味和海水味，可加入其他海鮮煮成鮮甜無比的海鮮湯。
材料
花咲蟹殼1隻、蜆500克、番紅花粉1/2茶匙、蒜粒2茶匙、洋葱1/2個（切粒）、番茄3個（切粒）、月桂葉3片、黑胡椒碎/鹽各適量、水1公升
做法
1.開大火燒熱鑊下油，爆香蒜粒、洋葱粒後，加入番茄粒略煮，加水，待滾起下花咲蟹殼。
2.番紅花粉加入1湯匙清水開勻，倒入炒過的蟹殼料內、下月桂葉，加蓋煮15分鐘。
3.加入蜆煮至開口，下鹽、黑胡椒碎調味即成。
白蘿蔔油甘魚芝麻煮
00hr20min
製作難度：★★★☆☆
份量：4人
Kei-san教路處理急凍魚的最佳方法，應在半解凍的狀態下落刀，魚身會較易切成件，而內臟也易於清理。
材料
油甘魚1條、白蘿蔔1/2條（切件）、薑片3片、薑絲適量、白芝麻1湯匙（炒香）
醬料：芝麻醬125毫升、熱水175毫升、味醂3湯匙、日本醬油1/2湯匙、豆瓣醬1/3茶匙
做法
1.將油甘魚切去頭，然後切約1吋厚件，將內臟棄掉，魚件洗淨。
2.把魚放入鍋，下白蘿蔔、薑片及醬料拌勻，開中火煮至滾起，收細火燜8分鐘。
3.最後下炒香白芝麻、薑絲即成。
貼士
燜煮時蓋上通氣的蓋，令水氣揮發，魚肉會更入味
酸汁鮫魚野菜
00hr25min
製作難度：★★☆☆☆
份量：4人
鮫魚煎過後十分甘香，配上酸甜開胃的白蘿蔔茸同吃，味道勁fresh﹗
材料
鮫魚1條、白蘿蔔1/4條、番茄1個（切片）、小青瓜1條（切絲）、黑胡椒碎/鹽各少許
白蘿蔔醃汁：鹽1/3茶匙、糖2湯匙、白醋１1/2湯匙
做法
1.鮫魚起魚柳，一開二，兩面撒上鹽和黑胡椒碎。然後開中火燒熱煎鑊，下油，放入鮫魚柳煎約2分鐘至兩面金黃，取出。
2.將白蘿蔔去皮磨成茸，瀝乾水份後加入醃汁料拌勻。
3.將番茄片鋪上碟，再放上鮫魚柳，魚柳面放上白蘿蔔茸和青瓜絲即成。
和風牛油煎三文魚扒
00hr25min
製作難度：★★★☆☆
份量：4人
來自福井的三文魚扒比挪威的魚味更濃，即使配上惹味的和風牛油汁料，也不會搶去魚鮮味。
材料
三文魚1條、牛油1湯匙、鹽/黑胡椒碎/麪粉各適量
醬汁料：牛油/糖/芫荽碎/檸檬汁各1湯匙、日本醬油/味醂各2湯匙、洋葱1/4個（切碎）、車厘茄4至5粒（切碎）
做法
1.將三文魚刮鱗去頭，魚身切約1吋厚件，棄掉內臟，魚件洗淨，以黑胡椒及鹽調味，再拍上麪粉。
2.開中火燒熱煎鑊，下少許油煮溶牛油，再下三文魚煎約2分鐘至金黃上碟。
3.燒熱另一煎鑊，以細火煮溶牛油至略焦香，下洋葱碎炒勻後，加入其餘的醬汁料煮勻，淋上三文魚扒面即成。
貼士
牛油炒至焦香才下其他材料炒勻，醬料會更美味。