4歲半就係黑帶高手？聽落幾匪夷所思，但恒宇仁龍拳啱啱就出咗個功夫天才，佢叫何宇豐，即將升K3，用咗17個月就由最低嘅白帶連跳9級，考到仁龍拳嘅黑帶一段，用拳、手刀、飛腳踢斷半吋厚木板係小兒科，就連李小龍絕招「寸勁」都識。雖然佢學嘅唔係詠春，但「一個打十個」嘅葉問係佢偶像，佢話會一直練習，希望可以去到黑帶十段，長大後保護媽咪。
夢想做科學家
父親係醫生、母親係語言訓練中心老闆，宇豐每個月除咗學功夫，游水、小提琴、畫畫乜都學，但最鍾意始終係中國功夫。黑帶六段教練蘇慧茵話佢哋呢個門派13年前開始教3歲以上兒童，最叻都係5歲半攞黑帶，宇豐係奇蹟，「佢比同齡小朋友專心、認真好多，又會返去自己練」。
宇豐熱愛武術，就算受傷捱痛都唔怕，佢睇過唔少成龍功夫片，但甄子丹《葉問》先係佢偶像，仲即場教記者連環出拳同擋格。不過，打功夫只係佢嘅嗜好，做一個科學家先係佢夢想。
宇豐母親覺得學功夫可以訓練手、腳、眼協調，強身健體，3歲多啲就畀個仔「入門」，唔擔心佢受傷，「唔想佢好似少爺仔咁」，但當初無諗住宇豐會學得咁快，個仔咁快攞到黑帶，佢話好自豪。