商天娥將與男友李偉誠於10月3日舉行婚禮，並在灣仔君悅酒店筵開40多席婚宴。為婚禮成功減了20磅的她，昨日一臉幸福滿瀉的樣子派發喜帖給正合作舞台劇的高志森。雖然婚禮籌備費用暫時已超過40萬，但她全不在乎，興奮等待婚禮的來臨。
商天娥昨日與李潤祺在中環綵排舞台劇《石塘咀如花與大舊勝》時，第一時間派發喜帖給監製高志森，她還宴請了杜國威及焦媛，並由高志森代收喜帖，娥姐說：「請好多朋友，費事有啲雖然係10年冇見面，但一見面就問點解冇請我飲，我有啲親戚喺內地，撞正10月國慶，驚酒店會好爆，如果唔夠位，可能會返內地再補擺多次酒。」她又指目前已減掉20磅，希望可以做個輕盈一點的新娘子，不想做海豚。
心急嗌老公
形容處於興奮待嫁心情的娥姐，全程笑不攏嘴，雖未正式成為李太，但已急不及待以老公相稱，娥姐說：「家仲係興奮期，今日開始派帖期，今早老公都去會場睇過，會場佈置仲差少少，發覺物料用塑膠唔環保，會改物料，簡單啲算，慳家啲，最大成本係樂隊，搞到party咁，氣氛好啲，我同老公都會唱埋一份。」
為免成為高齡產婦，娥姐表示沒生育計劃，她說：「唔會啦！咪做高齡產婦，要小朋友可以領養。」
採訪：魯萍 攝影：陳慧安