台灣名模白歆惠噚晚同有「小林志玲」之稱嘅師妹王心恬，以及熊黛林化身為貓女郎，喺香港太古坊幫化妝品牌M.A.C示範最新秋季彩妝，莊思敏、CaraG.等就去到捧場。
小志玲有男友
白歆惠扮住貓嘅動作出場，佢話自己性格好似貓咁愛理不理，講到對男友，佢就話唔會係老虎乸，有時嗌交都係自己低頭先。
白歆惠又自讚將來會係個好太太，佢話：「我和這男友拍拖4、5年，我們都有結婚計劃，但希望先賺多些錢，讓小孩將來生活得好一點。」提起同佢傳過緋聞嘅黃曉明都嚟咗香港，佢即刻話黃曉明唔係緋聞男友，仲話同曉明只係工作上嘅朋友。王心恬都好似師姐咁大方，承認有個25歲嘅男朋友，問佢怕唔怕做模特兒誘惑多？心恬話：「我不會隨便鍾意男人。」
黛林怕唔開心
熊黛林就再被追問會唔會同郭富城結婚？佢即刻話從來冇同人講呢啲問題，唔會逼婚，佢話結婚係配合自己嘅事業，唔係配合城城嘅時間，問佢怕唔怕做敗犬？佢話：「唔會囉，太早唔成熟，唔想後悔同有唔開心事發生。」會唔會怕嫁唔出？佢即刻話：「唔係啩。」佢又話自己好傳統嘅，結婚係一生一世，係咪等城城玩夠先？佢話：「我等自己玩夠先啦，家科技咁先進，我亦唔怕會做高齡產婦。」