「靚女飛魚」歐鎧淳（Stephanie）上周三會考放榜，拎23分做咗體壇狀元，即時被美國柏克萊大學取錄，下周二就起程；仲有唔夠一個星期就要走嘅Stephanie，噚日仍然好畀面咁抽空出席亞運記招。佢話對於去美國讀書既憧憬又緊張，已經嚟唔切唔捨得，呢幾日除咗執行李，就係每日同親友同學食飯，佢笑住講可能要食埋下午茶嚟爭取時間見人。
Stephanie啱啱讀完中五，9月已經飄洋過海做大學生，雖然頭一個星期有媽咪陪，但係香港訓練同美國好唔同；佢承認有啲擔心：「要啲時間協調同適應，我已經同大師姐蔡曉慧同家喺柏克萊讀緊嘅韋漢娜傾咗好多，但好多嘢都要到時執生；我諗只要刻苦啲，應該冇問題，我好想參加世界大學生運動會。」噚日大會送咗隻亞運吉祥物「樂羊羊」畀Stephanie，佢攬住讚好得意，仲話會帶去美國，提醒自己要畀心機練水游好亞運。