昨日跌市當中，兩隻創新高股份特別搶鏡，一隻係恒安國際（1044），另一隻係維達國際（3331），都係以產銷紙巾為主的日用品股，在當前調整市仍有此表現，凸顯兩間公司獨特的防守性。
事實上美股藍籌股P&G亦係防守性日用品股，近期表現不俗，可惜中國的洗頭水股選擇唔多，唯一較出名一隻卻受不利消息困擾。恒安及維達將於9月初公佈業績，即董事已進入禁止買賣期，在這段期間積極買貨者應屬睇好業績的機構投資者。
I.T波司登估值吸引
根據彭博綜合分析員預測，恒安2010年度每股賺2.08元，2011年每股賺2.51元，預測市盈率分別34倍及28倍，估值不算便宜，但市場資金仍然積極跟進，可見市場有信心公司能夠在未來幾年維持一定盈利增幅。至於維達估值無咁進取，2010年預測PE為19.9倍，2011年降至15.8倍，紙漿價格可能會是最大不確定性，但以每年逾兩成盈利增幅計，十多倍PE確係抵買。
除了紙巾股之外，服裝零售股都現強勢，不論男裝的中國利郎（1234）、波司登（3998）抑或便裝股中的I.T（999）、慕詩國際（130）等都見剛呈技術突破，這類股份之前曾經提及，既受惠國內市民收入增長，公司資本開支又不算高，令盈利及派息都可以維持高增長，在低息時期自然可以吸引一班好息之徒，除非國內人均收入增長停頓，否則這類高增長高派息股會繼續受捧。
以上股份又以I.T及波司登預測2011年PE分別11倍及13倍最為吸引。當外圍市況轉弱，主流股份炒到和黃（013）、電盈（008），某程度反映市場上可供選擇的具吸引力投資已經買少見少，日用品消費股此時再受投資者關注，十分正常。
歐陽風