朋友K對八達通出售客戶資料一事，非常勞氣，因為佢雖然冇參加日日賞，但為咗方便，參加咗「自動增值」，填寫咗一啲個人資料畀八達通卡，故此佢懷疑八達通將佢嘅資料賣咗出去。左丁山個個月去地鐵站為八達通卡用人手增值，從冇畀過私人資料，但朋友K與左丁山咪一樣，幾乎日日收到電話：「左先生，你要唔要借錢？」點解對方知道自己手機號碼？都費事查咯，無謂浪費時間。
朋友K講講吓，透露佢知道好多女兒之事，點解知咁多？並非女兒所講，而係從Facebook睇到，照計兒女上Facebook，唔會俾父母知道密碼嘅啫，朋友K話：「Facebook可以加朋友，加多幾加，佢加人又加，變咗我可以轉幾個彎就睇到阿女嘅Facebook資料，我當然唔會話畀佢聽啦！」呢，自己嬲八達通可能出售自己嘅資料，話八達通不尊重個人私隱，自己就出於愛女之心，千方百計去Facebook去睇愛女私隱，都幾雙重標準。左丁山就係老餅啲，一於唔開Facebook戶口，亦唔歡迎朋友add自己做friend，以免俾人煩親。
與朋友K拜拜，回到公司例牌上網瀏覽十幾分鐘，喺一個網上論壇見到一兩個「筆名」，熟口熟面，有時甚至早午晚都見過，心諗人哋真係得閒，咁多時間在網上發表意見，而且乜都識。後來與電腦T講起，佢話，內地有所謂五毛黨，即係指嗰啲收五毛錢（五毫子）就代人上網發表一次意見嘅網民，你肯畀錢，佢就代你上網發聲。左丁山懷疑家香港都有五毛黨，專門睇實部電腦，到處代人發表意見。咦，又話網民意見可能係民意，要重視嘅？如果係五毛黨所為，究竟為代表甚麼民意？電腦T話：「認真難以分辨，只能疑幻疑真，網上意見不可盡信，但如果有人不斷以不同名字在不同論壇重複對某產品嘅同樣負面意見，又可能傳遍網絡噃，做公關確係幾驚o架，故此現在又有行家發展新業務，代大公司監察網上有關該公司（特別係產品）嘅言論，一有異動，立即滙報！」睇住還睇住？如何回應？電腦T神秘一笑：「會有相反意見嘅，言論自由吖嘛！」