相信好多球圈中人同我求大俠一樣，聽到屯門普高呢隊波都驚。今季港甲又有一隊屯門參賽，不過呢隊係屬於屯門體育會旗下，背後有政府支持，仲由有「新界王」之稱嘅行會成員劉皇發做屯門體育會會長；屯門高層叫外界唔好搞錯，實行同前兩季搞到港甲雞毛鴨血嘅屯門普高劃清界線，話明係不一樣嘅屯門。
我求大俠記得，屯門普高前季借石硤尾會籍參加港甲，喺深圳做訓練基地已經夠騎呢，球員仲要住喺設備簡陋到爆嘅宿舍；到季尾兼職球員張天德爆國援涉嫌打假波「震驚」全港，足總要搵廉署調查，而總監任煒雄喺事件期間妙語連珠，聲淚俱下話球隊冇造假，紅極一時。
鄉親夾錢班費逾400萬
雖然普高嗰季護級成功，亦冇被起訴，但屯門唔知喺咪驚屯門普高整臭屯門個名，曾經去信足總要求禁止屯門普高用屯門個名參賽，最終唔成事，普高未到季中已經冇錢出糧，最後要足總下令退出、爛尾收場，提早消失於球圈。
至於呢隊如假包換嘅屯門，上季以乙組亞軍升班，成為港甲歷來第3支地區隊，今季除獲屯門區議會撥款支持，仲有劉皇發喺背後發功，得到區內鄉親夾錢組織一支班費逾400萬蚊嘅球隊出戰港甲；而且率先羅致上季踢沙田嘅塞爾維亞中場美高，仲託佢搵咗3個同鄉幫手，其中兩個已經到咗，另一個就嚟緊。
街場練波通街跑
不過，屯門12個全職土炮大部份都冇甲組經驗，最出名嘅有踢過南華同晨曦嘅門將魏釗；所以球隊目標好簡單，就係護級。教練之一盧光中喺噚日友賽同半力嘅晨曦踢成2:2後，就話上季地區隊沙田有錢有心有資源都降班，屯門今季升班都咪話唔擔心；惟有每日操兩至三課，將勤補拙。
可惜球隊未得到太多支援，同樣面對冇場練波嘅問題，堂堂職業隊要不時喺屯門區內嘅街場練波同練跑，你都咪話唔悲；至於大家好關心嘅「任總」任煒雄，早排上緊亞洲足協A級教練班，考得成仲有資格教國家隊，都咪話唔巴閉！