有人話出街食飯千祈唔好參觀餐廳酒家嘅廚房，因為睇完隨時食唔落，基於眼不見為乾淨，惟有自求多福博食你唔死。
港股在低成交下繼續忽上忽落，二仔底死跟內地股市，資金紛紛尋找避難所，要搵政策能見度高、唔怕中央打壓嘅板塊，一定離唔開基本民生消費必需品。
恒安國際（1044）與維達國際（3331）兩隻廁紙股股價雙雙創新高，查實只要旗下產品行銷中國大地，根本又唔需要點樣齊齊走向「國際」，只係市場上有另一隻叫做福和集團（923）嘅廁紙股，偏偏就斯人獨憔悴，個股價跟隨大市向下跌1.6%。
未必需要走向國際
其實有幾多人真係會用政府及公園廁所嘅廁紙我唔知，公司在今年3月底招股書中「風險因素」部份就列明把消委會調查報告顯示，其生活用再造紙因被驗出含菌量超標而遭廣泛負面報道所引起對公司營運及財務可能出現之負面影響視作風險之一。
不過，坊間覺得最經典震撼還要數有再造紙大王之稱嘅主席死撐到底，話你又唔係攞嚟吞落肚，換句話說，就即係叫你唔使咁緊張！
個人就從來唔會取用公廁嘅廁紙，不過就好留意人口紅利帶嚟嘅經營商機，真正可以面向國際嘅廁紙股，就有KimberlyClark、SCA及Georgia-Pacific；德國出品嘅Tempo，就係由SCA生產，Tempo更已成為紙巾代名詞，上述幾家公司共通點係除咗都有上市外，名字後面唔需要花巧地加上甚麼「國際」，卻成功把業務領域推向國際，營業額來源唔再獨沽一味，紙巾只貢獻其中一部份。
其實內地還有另一家總部位於中山市嘅生活用紙生產商廣東中順紙業，就咁聽名字好陌生，提到佢哋擁有嘅品牌C&S、潔柔及太陽，頓時又茅塞頓開。
胡孟青
作者為獨立股評人