特區問責或不問責高官，好似越來越怕曝光，記協早前踢爆高官愛吹風，主席麥燕庭同幾個執委，星期一同政府新聞處處長黃偉綸及幾個高層會面，會上麥姐話，所有政策都應該先開記者會發佈，之後高官愛吹風、吹水或以任何方式解畫，係政府嘅選擇，但斷不能習非成是，損害市民知情權。
記協噚日發通告簡述會面內容，引述黃偉綸稱政府絕對沒有以「吹風會」取代記者會嘅政策，黃處長又同意重大政策應該先開記者會公佈，至於何謂重大政策，雙方無共識。
高官吹風吹上癮，黃偉綸都唔敢貿然承諾日後不再搞吹風會，總之風繼續吹，又指官員會回應社會訴求，希望傳媒「聽其言，觀其行」。