「靚佬兵團」呢個花名，係時候同意大利國家隊講拜拜。新帥柏蘭迪利上任後人腳大變動，日前練習賽正選陣容，前線安排卡斯辛奴、巴洛迪利同埋由巴西歸化嘅阿馬利掛帥，話唔定日後會以呢個組合作為主打，係嘅話，藍軍從此化身「野獸兵團」嘞。
巴洛迪利膽生毛
咪話我求大俠以貌取人，我只係想講意軍鋒線總有靚仔靚佬掛帥，近代就有巴治奧、迪比亞路、韋利、恩沙基、托迪，就算今夏世界盃，起碼都仲剩個唔踢得都睇得吓嘅基拿甸奴，如今換嚟粗獷嘅阿馬利、巴洛迪利，仲有周不時發老脾嘅「壞孩子」卡斯辛奴，風格唔同晒。
阿馬利剛歸化入隊，就高調話一定唔會唱意大利國歌，一副我行我素模樣；巴洛迪利身為國際米蘭球員，曾經捧AC米蘭場、着AC米蘭波衫，果然膽生毛，而佢又公開話自己唔識控制脾氣，唔成熟；至於卡斯辛奴，自佢出道冇幾多個教練同佢冇磨擦，又試過喺球場向球證掟波衫……，意大利日後靠呢幾隻「異獸」撐場，有冇運行？唔知，只知前日新帥柏蘭迪利開操試陣，3個喺練習賽嘅預計正選隊合作嘅效果又真係唔錯，卡斯辛奴射入1球，巴洛迪利有1球助攻，最後以4:2打敗預計後備隊。
3獸對科特迪瓦料正選
如無意外，佢哋3個喺明日對科特迪瓦嘅友賽會齊列正選，呢個由一個歸化兵、一個黑人、一個壞孩子嘅進攻組合，咁多年喺藍軍都未出現過，即管睇吓實戰效果係點。教練柏蘭迪利唔只用人大膽，佢前日同球員講「意大利一定要勇於冒險，克服恐懼」嘅足球哲學，似乎甚為進取。藍軍被人話保守、悶波話足幾廿年，希望新帥唔係雷聲大雨點小，令藍軍畀人耳目一新感覺。