搭過國泰航機嘅乘客都會收過空姐「零錢布施」嘅信封，國泰航空行政總裁湯彥麟噚日數手指話，呢個機上籌款活動唔經唔覺已踏入20年，計劃至今已籌得逾一億元善款。佢話，乘客公幹或旅遊使唔晒嘅外幣零頭，夾埋已經幫助全球150個發展中國家嘅小朋友，改善生活。
聯合國兒童基金會駐埃塞俄比亞辦公室傳媒及對外事務主管話，以前埃塞俄比亞平均五個兒童之中，就有一個因為疾病或者飢餓死亡。多年嚟因為呢啲積小成多嘅捐款，非洲唔少國家嘅兒童得到教育、改善食水同衞生等幫助。希望大家坐飛機時收到「零錢布施」信封，都繼續幫助有需要嘅兒童，當然，用其他方法做善事亦多多唔拘。