時裝潮流每日變，泳衣不例外，現世代視穿比堅尼的終極目標是賣弄性感，以前穿一件頭的性感尤物賣的不是肉，而是氣質，正如形象指導張學潤話齋：「紅姑穿一件頭泳衣，散發出來嘅女人味，到今時今日依然魅力沒法擋。」我同意。
記者：葉雪芯
部份圖片攝影：譚盈傑
紅姑的性感，由一件頭開始……
A+B.
鍾楚紅當年選港姐，穿一件頭泳衣一臉稚氣，拍電影後她的女人味散發得淋漓盡致。
C.
另一套紅姑有份參與的電影《窺情》，泳衣照性感又健康。
D.
不少導演喜愛紅姑的健康性感形象，在《我愛神仙遮》裏，她以夏威夷比堅尼女郎造型出場。
E.
單看《青蛙王子》的封面，已感覺到紅姑的性感。
昔日泳衣顏色深沉
從事形象指導多年，張學潤（NelNel）閱女無數，對於時裝潮流當然瞭如指掌，談及泳衣，他說由始至今泳衣的潮流方向都沒太大分別，只是女人穿泳衣的態度和男人看女人穿泳衣的風氣有改變，「以前啲人好實際，着泳衣就係為咗落水，泳衣物料無咁多變化，設計無乜花巧。當年風氣比較保守，露手露腳已經好Sexy，好少女仔敢着比堅尼，當年啲女仔唔似家啲女仔咁瘦，人人都有啲肉地，所以好少會露咁多肉。四、五十年代好興着平腳一件頭泳衣，顏色比較深沉，多數係寶藍色、深灰色、黑白色，唔敢着到七彩，一路發展到港姐年代同占士邦電影系列興起之後，先至多咗女仔着比堅尼。」
時代畢竟不同，現今泳衣已成上位見報必備衣着之一，現在的所謂女星奀星脫星，每每靠一件性感泳衣，俯身刻意露事業線博見報博上雜誌封面，當年鮮有女明星穿泳衣亮相，「女明星着泳衣亮相好大件事，係好震撼嘅一件事。」惟有一年一度的香港小姐選舉，觀眾始能一次過見到這麼多穿泳衣的佳麗，在公仔箱裏行來行去。在那年頭，男士們亦較懂得以欣賞的角度細看女人穿泳衣，而非現在般只把焦點一味鎖死在胸前兩團肉，還望對方不小心走光。
鍾楚紅女人味十足
舊社會保守，但一樣出了不少性感尤物，NelNel：「嗰個年頭，一件頭泳衣加少少DeepV，已經足以叫人震撼。」講到他心目中的Sexyicon，他力推鍾楚紅，「紅姑真係一個經典，當年佢選港姐，雖然無任何名次，但我覺得佢真係好成功。當年夠膽着泳衣亮相嘅人唔多，紅姑不但敢，仲要唔靠賣肉，而係靠眼神、氣質、味道取勝。就算今時今日翻睇番佢啲泳衣相，依然覺得好正，一啲都唔會覺得娘。」
NelNel繼續陶醉：「紅姑出道選港姐，嗰陣仲好清純，個樣有啲稚氣，着泳衣都唔會覺得佢好性感。」對，回看她在1979年選港姐時的泳衣照，確實青春逼人，絕無賣肉意味，「到後來拍電影，佢嘅女人味出晒嚟，舉手投足都好誘人，最經典係電影《意亂情迷》，一套一件頭黑色DeepV泳衣好迷人，真係睇到人意亂情迷，當年不知係幾多少男心目中嘅女神。」這張泳衣照，相信大部份八十前男士都有印象，照片裏的鍾楚紅三七面，鬢髮輕拂略過面龐，穿叉頸式一件頭泳衣，擺個水蛇腰S形Pose，一雙迷離電眼震懾人心。得罪說，同樣是露事業線，鍾楚紅堪稱性感而不令人反感，現在的o靚模明顯道行不足，只懂夾胸，只懂鬥大鬥數字鬥級數，實難望其項背。「張曼玉又係另一個經典，除咗參選港姐着泳衣亮相外，佢其實好少影泳衣相，」NelNel說：「佢一行出嚟就畀到人一種清純少女味，好有氣質，呢啲又係另一種性感。當年佢拍電影《玫瑰的故事》，楊帆導演親自替佢影咗幾張泳衣相，真係好靚。」
凸點又何妨？
今時今日，每到夏天就成了比堅尼天下，懶理有肉無肉，沙灘總有一大班比堅尼女郎，o靚模們為求出位，谷大胸一味賣肉，NelNel認為這是時代轉變，大家心態不同了，「大家繼續緬懷當年性感尤物唔緊要，但潮流一定會向前行，家再着一件頭泳衣真係太老土喇，就算係Onepiece都要盡量少布啦，以前流行着平腳，家興高衩，以前唔鍾意要厚Pad，即使凸點都唔緊要，但家大家都鍾意有墊，甚至戴Nudebra，目的都係為谷胸，着泳衣唔再係為落水咁簡單，而係行出嚟身形要顯得Verygood，泳衣要幫到手改善身形。以前啲比堅尼，塊三角布仲大過家嘅胸圍，家？塊三角布就超細！」
昔日一件頭
